Դատարանը մերժել է Կարեն Բեքարյանի կալանավորման միջնորդությունը՝ հիմնավոր կասկածի բացակայության հիմքով․ փաստաբան

Դատարանը բավարարեց նաև ձերբակալման դեմ բերած բողոքն ու մերժեց կալանավորումը։ Այս մասին լրագրողների հետ զրույցում ասաց «Քառյակ մեդիայի» համահիմնադիր, հասարակական-քաղաքական գործիչ Կարեն Բեքարյանի փաստաբան Գոռ Միքայելյանը՝ անդրադառնալով Բեքարյանին կալանավորելու միջնորդության մերժմանը։

Նրա խոսքով՝ կալանավորման միջնորդության մեջ քննիչը վկայակոչել էր 3 հիմք՝ քննությունից թաքնվելը, քննությանը խոչընդոտելը և նոր հանցանք կատարելը։

«Որոշմանը դեռ ամբողջությամբ չեմ ծանոթացել, բայց այն, ինչ ինձ շատ հետաքրքրում էր, դրան ծանոթացել եմ՝ դատարանը մերժել է կալանավորման միջնորդությունը՝ հիմնավոր կասկածի բացակայության հիմքով, հետևաբար, կարծում եմ, որ անդրադարձած չի լինի նաև կալանավորման հիմքերին»,-ասաց նա։

Հարցին՝ քանի որ «Գագիկ Սողոմոնյան» ֆեյսբուքյան «ֆեյք» էջով շարունակվում են գրառումներ կատարվել, դա կարո՞ղ է համարվել քննությանը խոչընդոտելու հանգամանք, փաստաբանն արձագանքեց․ «Քննիչն այդպես փորձում էր ցույց տալ, որ գործում է կազմակերպված խումբ, մի մասը կալանավորված են, մի մասն էլ կալանավորվածների ցուցումներով ինչ-որ հրապարակումներ են կատարում, բայց դատարանն էլ փաստեց, և ակնհայտ է, որ դա որևէ առնչություն չունի պարոն Բեքարյանի հետ»։

Ըստ փաստաբանի՝ ԱԱԾ-ն չի կարող օբյեկտիվ քննել այս գործը․ «Ձերբակալումից հետո նույն ֆեյքը սկսել էր հրապարակումներ կատարել նաև ԱԱԾ-ի տնօրենի մասին։ Եթե ԱԱԾ-ն համարում է, որ Բեքարյանն առնչություն ունի այդ «ֆեյքի» հետ, բնականաբար անձնապես շահագրգռված է լինելու ամեն կերպ պատժել Բեքարյանին»,-նշեց նա։

Հիշեցնենք, որ Ազգային անվտանգության ծառայությունը ձերբակալել էր Ազգային ժողովի աշխատակազմի նախկին ղեկավար Արա Սաղաթելյանին, «Քառյակ մեդիա»-ի համահիմնադիր Կարեն Բեքարյանին և «Պառլամենտարիզմի զարգացման միջազգային կենտրոն» հասարակական կազմակերպության գրասենյակի մենեջեր Մհեր Ավագյանին և քաղաքացի Արամ Սարգսյանին: