Տպավորություն է, որ նոր հանգրվանի ենք մոտենում Արցախյան հիմնախնդրում. Աննա Կարապետյան (տեսանյութ)
Բավական ակտիվ շփումներ են տեղի ունենում Արցախյան հակամարտության թեմայով և տպավորություն է, որ նոր հանգրվանի ենք մոտենում՝ կա՛մ նոր հանդիպման, կա՛մ նոր փաստաթղթի, կա՛մ պայմանավորվածությունների կատարման տեսքով: Այս մասին «Առավոտյան լուրեր Լիլիթ Թումանյանի հետ» հաղորդման «Հայացք. Երկրագունդ» խորագրի ներքո ասել է «Հայացք» վերլուծական կենտրոնի տնօրեն Աննա Կարապետյանը:
«Զուգահեռ երկու գործընթացներ են տեղի ունենում: Մի կողմից՝ Ռուսաստանի շփումներն են Հայաստանի, Ադրբեջանի ղեկավարության հետ, և այստեղ հիմնական շեշտը դրված է նոյեմբերի 10-ի, հունվարի 10-ի պայմանավորվածությունները կյանքի կոչելու վրա: Մյուս կողմից՝ տեսնում ենք ԵԱՀԿ ՄԽ համանախագահության ակտիվացում, որը բավական սպասելի էր՝ հաշվի առնելով Միացյալ Նահանգներում ներքաղաքական գործընթացների տրամաբանությունը»,- ասել է նա:
Փորձագետի խոսքով, ԵԱՀԿ ՄԽ համանախագահության կողմից այս փուլում քննարկվում է բանակցային գործընթացի հնարավոր ձևը և այն, թե ինչ կարող է անել ընդհանրապես համանախագահությունը:
«Բովանդակության մասին խոսք չկա, ինչը մտահոգիչ է: Մտահոգիչ է նաև, որ քննարկվում է ԵԱՀԿ Գործող նախագահի անձնական ներկայացուցչի գրասենյակի հետագա գործունեությունը: Հարց է առաջացել համանախագահության մոտ, թե արդյո՞ք դեսպան Կասպրչիկի գրասենյակը պետք է շարունակի գործունեությունը, թե՞ ոչ»,- նշել է Կարապետյանը:
Քաղաքագետը նշում է, որ այսօր խաղաղապահները երաշխավորում են Արցախի անվտանգությունն ու կայունությունը տարածաշրջանում, բայց ցանկացած պահի հնարավոր է Ադրբեջանի պահանջով նրանք դուրս բերվեն տարածաշրջանից:
«Եթե Կասպրչիկի գրասենյակը փակվի, մենք կկորցնենք միջազգային մոնիտորինգի կարևոր ինստիտուտ»,- նշում է Աննա Կարապետյանը:
Անդրադառնալով հնարավոր բանակցությունների օրակարգին՝ փորձագետը նշել է. «Հայկական կողմն այսօր խոսում է ԵԱՀԿ ՄԽ համանախագահության շրջանակներում բանակցային գործընթացի հասցեագրման մասին, և հարց է առաջանում՝ արդյո՞ք հայկական կողմն իսկապես ունի տեսլական, սահմանել է իր համար առաջնահերթություններն ու գերակայությունները և իր ակնկալիքը հետագա գործընթացից: Մենք տեսնում ենք, որ Ադրբեջանն է այսօր թելադրում օրակարգ, իսկ հայկական կողմը բացառապես սպասարկում է նրա պահանջները»:
Մանրամասները տեսանյութում: