Աշխարհի ամենամեծ այսբերգը մի քանի մասի է բաժանվել
Փետրվարի 11-ին ստացված արբանյակային լուսանկարներում սառույցի փոքր բեկորներ են երեւում Հարավային Գեորգիա կղզու մոտակայքում` Անտարկտիկական թերակղզուց 1500 կիլոմետր դեպի հյուսիս-արեւելք: Այս սառոցե բեկորներից յուրաքանչյուրը A-68a հսկայական այսբերգի մի մասն է, գրում է Planet- today-ը:
Այն արդեն երեք տարուց ավել ամենամեծն է համարվում աշխարհում, սակայն վերջերս ավելի փոքր մասերի է բաժանվել: Ընդհանուր 11 բեկոր կա, սակայն լուսանկարում երեւում է միայն դրանց մի մասը: Յուրաքանչյուր նոր բեկորին փորձագետներն արդեն անուններ են տվել: A68a այսբերգը ձևավորվել էր դեռ 2017-ի ամռանը` բաժանվելով Larsen C մեծ սառցադաշտից Անտարկտիդայում, այդ ժամանակ սառցե կտորի մակերեսը 5800 կմ 2 էր:
Օվկիանոսում լողացող նման մեծ օբյեկտը կարող է արգելափակել ծովային կենդանիների սննդի աղբյուրները եւ ոչնչացնել դրա ճանապարհին հայտնվող կղզիների էկոհամակարգը: Այն չափազանց վտանգավոր է նաեւ նավերի համար: Այդ պատճառով էլ մասնագետներն ուշադիր հետեւում են այսբերգին եւ դրանից պոկված բոլոր կտորներին:
A-68a սառցաբեկորի բաժանումը սպասելի էր: Մի քանի ամիս առաջ արված արբանյակային լուսանկարներում արդեն ճաքեր եւ կոտրվածքներ էին երեւում դրա մակերերսին, որոնք էլ հանգեցրեցին բաժանմանը: