«Մի թաղումը քանի՞ նոր թաղման պատճառ կդառնա». հարյուրավոր հավատացյալներ` առանց դիմակ ու իրար կիպ-կիպ կանգնած. NYT-ը` համավարակի պայմաններում ուղղափառ հրեաների հակասական վարքի մասին (տեսանյութ)
Ամերիկյան հեղինակավոր The New York Times պարբերականն աշխարհը պատուհասած կորոնավիրուսային համավարակի համատեքստում ուշագրավ անդրադարձ է կատարել Իսրայելի խիստ պահպանողական ուղղափառ հրեաների համայնքին` նկատելով, որ վերջիններս կազմելով երկրի բնակչության 12,6%-ը, կորոնավիրուսի տարածման հարցում «առաջամարտիկ» են. վարակման դեպքերի 28%-ը գրանցվել է հենց ուղղափառ հրեաների շրջանում:
Բազմանդամ ընտանիքներ, խմբակային աղոթքներ, հարյուրավոր սգացողներով հուղարկավորության արարողություններ. դատելով այս ամենից` համավարակի պայմաններում անհրաժեշտ համարվող սոցիալական հեռավորության պահպանումն ուղղափառ հրեաների համար հակաթեզ է: Հատկանշական է, որ երբ այս համայնքի ներկայացուցիչները վարակվում են կորոնավիրուսով, հաճախ բուժվում են տնային պայմաններում` կամավորների օգնությամբ:
Վերադառնալով նրանց կազմակերպած բազմամարդ հուղարակավորության արարողություններին, որոնց մասնակիցների թիվը հաճախ հասնում է մի քանի հազարի, պարբերականը հռետորական հարցադրում է անում` «այս մի թաղումը քանի՞ նոր թաղման պատճառ կդառնա»:
Սևազգեստ տղամարդիկ, արմունկներով իրար հրելով, մեկը մյուսի ոտքերը տրորելով, համատարած «սևի ծովում» փորձում են ձգվել դեպի ռաբբիի (հոգևոր ուսուցիչ) դին և այդպիսով ի ցույց դնել իրենց դավանական նվիրվածությունը:
Տեսանյութը և լուսանկարները՝ սկզբնաղբյուրում:
Աղբյուրն անդրադառնում է Երուսաղեմում ուղղափառ հրեաների թաղամասերից մեկում, երկրում հայտարարված երրորդ խիստ «լոքդաունի» ժամանակ, տեղի ունեցած հուղարկավորությանը: Այն կազմակերպվել էր այն ժամանակ, երբ իշխանություններն արգելել էին հավաքները, դիմակի կրումը պարտադիր պահանջ էր, մինչդեռ վարակի տարածվածության մակարդակը գտնվում է իր բարձրակետին` հատկապես ուղղափառ հրեաների շրջանում:
Այդուհանդերձ, հարյուրավոր սգացողներ` մեծ մասն առանց դիմակի, այցելել է իրենց ռաբբիի չարտոնված հուղարկավորության արարողությանը: Հատկանշական է, որ ռաբբին մահացել էր կորոնավիրուսից: Սակայն համայնքի ներկայացուցիչների համար այցելությունն ու մասնակցությունը կրոնական և անձնական պարտավորություն էր:
Հավատացյալների այս դիրքորոշումը չեն կիսում ուղղափառ հրեա կանանց իրավունքների պաշտպանությամբ զբաղվող ակտիվիստները, որոնց համոզմամբ` չվարակվելն ու ողջ մնալը շատ ավելի կարևոր է, քան հոգևոր ուսուցչին հանդերձյալ աշխարհ ճանապարհելը:
Հայտնի է, որ Իսրայելը կորոնավիրուսային համավարակից ամենաշատ տուժած երկրներից է, սակայն ուղղափառ հրեաների առաջնորդը համավարակի ամենասկզբում հայտարարել է, որ իր հետևորդները պաշտպանված են լինելու վարակից:
Այնուհանդերձ, վիճակագրությունն այլ է փաստում: Ուղղափառ հրեաների շրջանում վարակի տարածվածությունն ամենաբարձր ցուցանիշներից մեկն ունի, քանի որ նրանք մեծ ընտանիքներով ապրում են փոքր տներում և անտեսում են վարակի կանխարգելմանն ուղղված միջոցառումները: