Դեռ ամիսներ առաջ պարզ էր, որ պետությունն աշխատավարձեր վճարելու խնդիր է ունենալու, բայց իշխանությունը հերքում էր. Լիլիա Ամիրխանյան (տեսանյութ)
Պետության կողմից պարտքի ներգրավումը բնականոն գործընթաց է, խնդիրը երկու հարթությունում է՝ որքանով են այդ միջոցներն ուղղվում նոր արժեք ստեղծելուն, և ուր է հասնում պետական պարտքի շեմը: Այս մասին «Առավոտյան լուրեր Լիլիթ Թումանյանի հետ» հաղորդման «Հայացք. տնտեսություն» հատվածում ասել է «Հայացք» վերլուծական կենտրոնի փորձագետ Լիլիա Ամիրխանյանը:
«2020թ.-ին բյուջեի հաշվին կառավարության կողմից իջեցված մի շարք հակաճգնաժամային միջոցառումները մի կողմից անարդյունավետ էին, ինչն արտացոլվել է մակրոտնտեսական հիմնական ցուցանիշներում անկման տեսքով, մյուս կողմից դա արվում էր՝ մեզ կանգնեցնելով բազմաթիվ խնդիրների առաջ: Դեռ այն ժամանակ բարձրաձայնում էինք հարցը, որ բյուջեն կանգնելու է նվազագույն բյուջետային պարտավորությունների կատարման խնդրի առջև, պետությունն ունենալու է աշխատավարձեր վճարելու խնդիր, բայց իշխանությունը փորձում էր համոզել, որ նման խնդիր չունենք: Իշխանությունը հակառակն էր պնդում նաև 2020թ.-ի տարեվերջին, երբ ԱՄՀ-ից բյուջետային վարկ ներգրավվեց, բայց այսօր արդեն փաստացի բաց տեքստով խոսում է դրա մասին»,- նշել է Ամիրխանյանը:
Խոսելով եվրոբոնդերի թողարկման մասին՝ փորձագետը նշել է, որ եվրապարտատոմսերի հարցը պետք է նայել Հայաստանի փորձի և աշխարհում տիրող իրավիճակի մակարդակով: «Մեզ համար համադրելի տնտեսությունները եվրոբոնդեր թողարկել են 2,5-3 տոկոս եկամտաբերությամբ, ինչը ցածր է Հայաստանի կողմից այսօր թողարկվածներից: Բնական է, որ այս պարագայում հայկական պարտատոմսերի նկատմամբ կլինի պահանջարկ, բայց դա ներկայացնել որպես մակրոտնտեսական կայունության ցուցիչ, կեղծ օրակարգ է»:
Մյուս կողմից, Լիլիա Ամիրխանյանը նշում է, որ զուտ Հայաստանի կողմից թողարկված եվրապարտատոմսերի նախադեպերի տեսանկյունից, հաջող թողարկումներն ու տեղաբաշխումները գուցե իսկապես ձևավորել են որոշակի վստահություն հայկական արժեթղթերի նկատմամբ, բայց սխալ կլինի դա համարել զուտ այս իշխանությունների ձեռքբերում: Ըստ նրա, առհասարակ խոսել մակրոտնտեսական կայունության մասին այն դեպքում, երբ կա դրամի արժեզրկում, գների աճ, գուցե հնարավոր է այն տրամաբանության ներքո, ինչ տրամաբանությամբ, որ սոցապ նախարարը պնդում է, որ Արցախում սոցիալական ճգնաժամ չկա:
Հաղորդման ընթացքում անդրադարձ է եղել նաև գների աճին: «Վիճակագրական կոմիտեի հրապարակած տվյալները ցույց են տալիս, որ առաջին անհրաժեշտության ապրանքների մասով ընդհուպ մինչև 47 տոկոսանոց գնաճ ունենք և չկա դեռ զգացողություն, որ գործընթացը կանգնած է»,- նշել է Լիլիա Ամիրխանյանը: Ըստ նրա և՛ օբյեկտիվ պարամետրերը կան, այդ թվում՝ համաշխարհային գնաճը, և՛ օրինակ հոսանքի թանկացումը, որը կրկին վերաբերում է տնտեսվարողներին, հետևաբար՝ իր շարունակական ազդեցությունը կունենա գների վրա:
Մանրամասները՝ տեսանյութում: