Վերին Շենգավիթում 65 քմ ընհանուր մակերեսով այգու տարածքը 2017- ին սեփականացրել են և վաճառել
Երևանի ավագանու այսօրվա նիստին «Բարգավաճ Հայաստան» խմբակցության անդամ Արմեն Ներսիսյանը դիմեց քաղաքապետ Հայկ Մարությանին՝ նշելով, որ Վերին Շենգավիթ երկրորդ փողոցի առաջին շենքից 6 մետր հեռավորության վրա է գտնվում այգին, որտեղ ծառեր կան տնկված և խաղահրապարակ է կառուցված, սակայն 2017- ին սեփականացրել են այդ հողակտորը՝ 65 քմ ընհանուր մակերեսով, և վաճառել են: Սեփականատերը դիմել է դատարան, դատարանը ճանաչել է, որ այդ հողակտորի տարածքից խաղահրապարակը պետք է քանդվի, և ոստիկանության ու շատ մարդկանցով եկել և խաղահրապարակը քանդել են:
Նրա խոսքով՝ ավագանու անդամ Մարկոս Հարությունյանը խոսել է քաղաքացու հետ, որ այլ տարբերակ մտածեն, բայց նա հրաժարվել է՝ ասելով, որ Իրավաբանական վարչության հետ զրուցել է, իր պահանջն է եղել 4 մլն 700 000 դրամ, որ փոխհատուցվի, բայց չի փոխհատուցվել, և դիմել է դատարան. «Ես՝ որպես ավագանու անդամ, ձեզանից խնդրում եմ՝ եկեք այս հարցը լուծենք 4մլն 700 000 դրամը տանք այդ մարդուն, գնա, այդ խաղահրապարակը չքանդվի: Պարոն, քաղաքապետ, Ձեզ չեն տեղեկացնում ոչ մի բան, ես վստահ եմ՝ եթե Ձեզ տեղեկացներին, որ 4 մլն 700 դրամի հարց է, կասեիք՝ տվեք, թող տվյալ քաղաքացին հեռանա, բայց Ձեզ չեն զեկուցել, որովհետև իրավաբանական վարչությունն այնքան քիչ մարդկանցով է աշխատում, որ մինչև անգամ դատարան չեն կարողանում ներակայանալ: Հիմա ասեք՝ պատրա՞ստ եք 4 մլն 700 դրամ վճարել տվյալ քաղաքացուն, և նա հեռանա այդ բակից, որովհետև այդ բակի բնակիչները թույլ չեն տալու, որ նա այդտեղ շինարարություն անի»:
Հայկ Մարությանը պատասխանեց․ «Ես պատրաստ եմ, 4 մլն 700 000 դրամը բաժանում եմ մեր ավագանու 65 անդամների թվին, անում է 72 հազար 307 դրամ, եթե տանք, այդ հարցը կլուծվի՞, իսկ քաղաքապետարանն իրավունք ունի՞ գումար տալու, թե ոչ, պետք է հասկանալ, գնահատման գին կա, կարող են ասել, օրինա՝կ գինը 2 մլն 500.000 է, դուք տվել եք 4 մլն 700 000 դրամ, իմ խորհրդականը գլխով է անում, որ այո, կհարցնենք:
Ներսիսյանը հակադարձեց. «Թող Ձեր խորհրդականը Ձեզ ճիշտ զեկուցեր, որ մարդը 4 մլն 700 000 դրամ է ուզեցել, մենք մերժել եք, նա էլ դատարան է դիմել, ու դատարանն էլ առանց նայելու, որ 6 մետրի վրա ծառեր կան տնկված, խաղահրապարակը քանդել են, այս հարցին լուծում տվեք, ինչքան քաղաքապետարանը կտա, մնացած մասը թաղի բնակիչները պատրաստ են հավաքելու»:
Քաղաքապետի աշխատակիցը պարզաբանեց, որ քաղաքացին Երևան համայնքին 4 մլն 700 000 դրամ պարտք ունի, ասում է՝ քանի, որ զրկված եմ եղել իմ հողամասը օգտագործելուց, պարտքը զրոյացրեք:
Մարությանն ասաց, որ ինքը պատրաստ է, եթե բոլոր ավագանու անդամները հավաքեն գումար, իսկ եթե քաղաքապետարանն է վճարելու, պետք է օրենքի և լիազորությունների սահմանում գործել: