Սիմոնյան. Իշխանությունը հիմքեր չունի իր հեռացման հետ կապված հանրային պահանջարկի բացակայության մասին հայտարարելու համար
Կարող է տպավորություն ստեղծվել, թե կառավարությունն ի դեմս վարչապետ Նիկոլ Փաշինյանի որոշակի մտավախություններ ունի, որ եթե հրաժարական տա, ապա ինչ-որ մեկը կարող է իր թեկնածությունն առաջադրել եւ «Իմ քայլի» որոշ պատգամավորներ կարող են աջակցել նրան: Այս մասին NEWS.am-ի հետ զրույցում ասել է «Լուսավոր Հայաստան» կուսակցության պատգամավոր Տարոն Սիմոնյանը՝ մեկնաբանելով արտահերթ ընտրություններ անցկացնելու գաղափարից հրաժարավելու իշխող դաշինքի որոշումը:
Այսպիսով, պատգամավորի կարծիքով, այնպես է ստացվում, որ գործող իշխանությունը պարզապես չի վստահում սեփական պատգամավորներին եւ սեփական քաղաքական դիրքորոշմանը: «Եվ երկրորդ տարբերակը: Նրանք պարզապես վախեցած են եւ չեն ցանկանում արտահերթ ընտրություններ անցկացնել, քանի որ իրենց հայտնի է, որ իրենց վարկանիշը բավական ցածր է: Այլ տարբերակ ես պարզապես չեմ պատկերացնում»,-նշեց Սիմոնյանը:
Նա նաեւ անտրամաբանական համարեց մեղադրանքները, որոնք հաճախ հնչում են ընդդիմության հասցեին՝ կապված գործող իշխանության դեմ պայքարում նրա ակտիվության հետ: Պատգամավորի պնդմամբ՝ ընդդիմությունն անում է ուժերի ներածին չափով ամեն ինչ:
Տարոն Սիմոնյանը համաձայն չէ իշխանությունների պնդման հետ, թե վարչապետի հեռացման մասով հանրային պահանջարկ չկա: «Իսկ ո՞վ է գնահատում այդ հանրային պահանջարկը: Ի՞նչ սոցիալական հարցումներ են անցկացվել: Նրանք լիարժեք բացահայտե՞լ են պահանջարկը: Դրա համար հատուկ գիտական-սոցիոլոգիական հետազոտություններ են անհրաժեշտ: Դրանից ո՞րն է արվել: Ոչ մեկը»,-նշել է պատգամավորը:
Միեւնույն ժամանակ, նա չբացառեց, որ իշխանությունները կարող էին որոշ հետազոտություններ անցկացնել, եւ որ դրանց արդյունքները Փաշինյանին ձեռնտու չեն եղել:
Հիշեցնենք, որ երեկ «Իմ քայլի» պատգամավորները հանդիպել են Նիկոլ Փաշինյանի հետ: Հանդիպման արդյունքներով հաղորդագրություն է տարածվել, որում խորհրդարանական մեծամասնությունը նշել է, որ «արտահերթ խորհրդարանական ընտրություններ անցկացնելու վարչապետի առաջարկը դրական արձագանք չի ստացել խորհրդարանական ընդդիմության կողմից, բնակչության լայն շերտերի շրջանում արտահերթ ընտրություններ անցկացնելու հասարակական պատվեր չկա»: