Տարվա վերջում պետական պարտքը կմոտենա 8.9 մլրդ դոլարին. Ատոմ Ջանջուղազյան
Պարտատոմսերի թողարկումը պետական բյուջեում նախատեսված է որպես դեֆիցիտի ֆինանսավորման աղբյուր` միջազգային ֆինանսական շուկայից արտարժույթային պարտատոմս ներգրավվելու ճանապարհով: Այսինքն սա ոչ թե լրացուցիչ չհաշվարկված պարտքի ներգրավվում է, այլ օրենքով 2021 թվականի դեֆիցիտը ֆինանսավորելու նպատակով նախատեսված աղբյուրի իրականացում: Այս մասին այսօր լրագրողների հետ հանդիպման ժամանակ նշեց ֆինանսների նախարար Ատոմ Ջանջուղազյանը՝ անդրադառնալով Հայաստանի կողմից 750 մլն դոլար պարտատոմսեր թողարկելուն:
Հարցին, թե այս տարվա ավարտին Հայաստանի պետական պարտքը և ՀՆԱ-պարտք հարաբերակցությունը որքա՞ն կկազմի, նախարարը նշեց՝ դա կախված է նրանից, թե տարվա ընթացքում ինչպիսին կլինի փոխարժեքը:
Անդրադառնալով այս տարվա պետական պարտքին՝ Ջանջուղազյանը նշեց. «Ենթադրվում է՝ Կառավարության պարտքը կմոտենա 8.5 մլրդի, իսկ պետական պարտքը, որն այս դեպքում ներառում է մոտ 400-500 մլն, Կենտոնական բանկի պարտքը կմոտեցնի 8.9 մլրդ դոլարի, այլ կերպ ասած մոտ 66 տոկոս կառավարության պարտքն է, մինչև 70 տոկոս՝ ընդհանուր պարտքը»:
Հարցին, ո՞րն է պետական պարտքի ամենաբարձր շեմը, կարո՞ղ է մոտենալ 90 տոկոսի, Ջանջուղազյանն ասաց՝ զարգացող երկրների համար 70-ից բարձր պարտք-ՀՆԱ հարաբերակցությունը համարվում է միջին ռիսկայնություն ունեցող, երբ հստակ չէ հետ վերադարձի սցենարը. «Մենք պետք է բոլորով դիտարկենք այն սցենարներն, որոնք թույլ կտան պարտքը վերադարձնել կառավարելի միջակայք: Պետք է ջանք գործադրենք, որ վերառանանք այս շեմին: Մենք պետք է մտածենք ոչ թե պարտքը նվազեցնելու, այլ ՀՆԱ-ն ավել աճեցնելու մասին»:
Խոսելով տնտեսական անկման ցուցանիշի մասին՝ Ջանջուղազյանն ասաց, որ դա 7.5 տոկոս է կազմում, բայց ենթադրվում է, որ այս ամսվա վերջին կլինի ՀՆԱ-ի մասին առաջին տեղեկատվությունը. «2021 թվականի համար կանխատեսված է 3.2 տոկոս աճ, հավակնություններ ունենք, որ ջանքեր ներդնելու դեպքում ավելի բարձր աճ կունենանք և մեծ հնարավորություններ կստեղծվեն»:
Ատոմ Ջանջուղազյանը նաև նշեց, որ պարտատոմսերի թողարկումը 2013 թվականին ծավալը կազմել է 700 մլն դոլար, 2015 ին՝ 10 տարվա մարման ժամկետով՝ 700 մլն դոլարի թողարկում է եղել, իսկ 2019 թողարկվել է 500 մլն: