Ախալքալաքցիները կրկին բողոքի ակցիա էին արել՝ Վրաստան-Հայաստան ցամաքային սահմանը բացելու պահանջով (Տեսանյութ)
Ախալքալաքցիները երեկ կրկին բողոքի ցույցի էին դուրս եկել Վրաստան-Հայաստան ցամաքային սահմանը բացելու պահանջով։ Ցուցարարները հանդիպել են Ախալքալաքի քաղաքապետ Յուրի Ունանյան հետ եւ ներկայացրել իրենց խնդիրները ու այդ խնդիրներից բխող պահանջները։
Ինչպես տեղեկացնում է akhaltskha.net կայքը, իրենց համար անհասկանալի է՝ ինչու Հայաստանի և Վրաստանի միջև օդային սահմանը բաց է, իսկ ցամաքայինը մնում է փակ։
Ախալքալաքի քաղաքապետի հետ հանդիպման ընթացքում ցույցի մասնակիցներից մեկը քաղաքապետին տեղեկացրեց, որ իրենք չեն կարող բանկերի վարկը վճարել, իսկ կարտոֆիլը օրեցօր արժեզրկվում է։
Նրա խոսքով իրենք պատրաստ են երկու շաբաթ կարանտինում անցկացնել միայն թե Վրաստանը բացի սահմանը Հայաստանի եւ Ռուսաստանի հետ։ Ցուցարարների խոսքերով եթե իրենց պահանջները չիրականացվեն ապա նրանք կրկին հավաքվելու են մեկ շաբաթից։
Հիշեցնենք, որ նմանատիպ ցույց էր տեղի ունեցել նաեւ հունվարի 31-ին։ Կորոնավիրուսային պանդեմիայի պատճառով Վրաստանի փակ սահմանները լուրջ խնդիրներ են ստեղծում մարդկանց համար։ Ջավախքում, որտեղ հիմնականում չկան աշխատատեղեր բնակչության մի զգալի մասը ապրում է արտագնա աշխատանքի միջոցով։