Սերը պատերազմի ժամանակ. հիվանդանոցում ծանոթացած Նարինեն և Սերգեյը արդեն նշանադրվել են
Բժշկական համալսարանի ուսանողներ Նարինեն և Սերգեյը պատերազմի ժամանակ մեկնել են Արցախ, որտեղ էլ մտերմացել և սիրահարվել են:
«Սեպտեմբերի 27-ի վաղ առավոտյան ընկերս եկավ մեր տուն և ասաց, որ պատերազմ է սկսվել: Ասացի՝ ուրեմն պետք է գնանք: Մեր ավտոմեքենաները լցրեցինք դեղորայքով և անհրաժեշտ պարագաներով և ճանապարհվեցինք Արցախ: Գնացինք Ստեփանակերտ, մի փոքր աշխատեցինք և տեղափոխվեցինք Մարտունի»,- NEWS.am-ի հետ զրույցում պատմեց Սերգեյ Արամյանը:
Նարինեն ծնունդով Արցախի Մարտունու շրջանից է: Նարինեի հայրը զինվորական է՝ ռազմական բժիշկ:
«Սեպտեմբերի 28-ին դասի էի, բայց մտքով Արցախում էի: Հենց այդ օրը հայրիկս պետք է մեկներ ռազմաճակատ: Զանգեցի ու ասացի, որ ես էլ եմ գնում: Իհարկե, սկզբում, բացասական արձագանքեց, բայց համոզեցի և միասին գնացինք Արցախ՝ Մարտունու հիվանդանոց»,- ասաց Նարինե Արզումանյան:
Նարինեն և Սերգեյը ռազմաճակատում առաջին անգամ հանդիպել են սեպտեմբերի 29-ին:
«Սեպտեմբերի 29-ին ընկերոջս հետ հոսպիտալից վիրավոր էինք տեղափոխում հիվանդանոց: Այդտեղ էլ տեսա Նարինեին: Չեմ կարող բացատրել՝ ինչ զգացի: Ու այդ պահից ինչքան ազատ րոպե գտնում էի, վազում էի հիվանդանոց՝ Նարինեին տեսնելու»,- հիշեց Սերգեյը:
Նարինեն և Սերգեյը սովորում են Երևանի պետական բժշկական համալսարանի ընդհանուր բժշկության ֆակուլտետի 6-րդ կուրսում: Սերգեյն ապագա ուրոլոգ է, Նարինեն՝ սրտաբան:
«Թեպետ նույն կուրսում էինք սովորում, բայց տարբեր հոսքերում էինք և իրար գրեթե չէինք ճանաչում: Սակայն պատերազմի ժամանակ երբ տեսա Սերգեյին, այնքան ուրախ էի, որ այդ քաոսի մեջ հարազատ մարդու տեսա»,- նշեց Նարինեն:
Նարինեն և Սերգեյը հոկտեմբերի 10-ին վերադարձել են Երևան, որտեղ շտապ օգնությամբ վիրավորների են տեղափոխել Հայաստան:
«Անընդհատ ռմբակոծվող ճանապարհներն առանձին փորձություն էին: Սկզբում՝ երբ մենակ էի, վախ չունեի, բայց երբ հանդիպեցի Նարինեին արդեն վախենում էի իրեն կորցնելուց»,- ասաց Սերգեյը:
Թե Նարինեն, թե Սերգեյը նշում են՝ պատերազմն իրենց կյանքում շատ բան փոխեց և վերաիմաստավորեց:
«Պատերազմի ժամանակ ամեն ինչ այլ է՝ արժեքներն այլ են, ձևականությունների ետևից չես ընկնում: Վախենում ես կորցնել այն, ինչը թեկուզ և նոր ես գտել, բայց թանկ է դարձել: Կյանքս վերաարժևորեցի: Հասկացա, որ այն ամենն, ինչն առաջ ինձ համար սովորական էր, օրինակ՝ զբոսնելը, հարազատներիս հետ զրուցել, թեյ խմելը, ամենաթանկն են»,- պատմեց Նարինեն:
Նարինեն և Սերգեյը նշանադրվել են հունվարի 24-ին: Պատրաստվում են ամուսնանալ այս տարվա ամռանը:
«Ցանկանում ենք շատ երեխաներ ունենալ: Ցավոք, մեր հազարավոր եղբայրները զոհվեցին, և մենք այնքան երեխաներ պետք է ունենանք, որ այդ ահռելի կորուստը լրացնենք»,- ավելացրեց Սերգեյը: