«Ալիևը սպասում էր բանակցության, և տեղի ունեցավ Դուշանբեի հայտնի առեղծվածը, որ ոչ թե բանակցություն էր, այլ բազար էր 2 հոգու միջև՝ ղումարբազի բազար». Ռազմիկ Դավոյան (տեսանյութ)
Ամբողջ ավերմունքը տեղի ունեցավ, երբ նորաթուխ իշխանությունը հայտարարեց, որ ամեն ինչ սկսում է զրոյից: Սկսել զրոյից, այսինքն՝ զրոյացնել ինչ-որ կա Հայաստանում, բոլորը տրորել և այդ հայտարարությունից հետո Հայաստանում սկսվեց անասելի խրախճանք, ամեն ինչ զրոյացնել, ինչ ունի հայությունը. այսօր լրագրողների հետ հանդիպման ժամանակ նշեց բանաստեղծ Ռազմիկ Դավոյանը՝ անդրադառնալով Նիկոլ Փաշինյանի այն հայտարարությանը, որ Արցախի հարցի հետ կապված բանակցությունները, ամեն ինչ սկսում է զրոյական կետից:
«Այդ խրախճանքը ցնծությամբ ընդունեցին, այսպես կոչված, ազատամիտ եվրոպացիները, Թուրքիան հրճվանքի մեջ էր, Ալիևը խենթացել էր ուղղակի այդ հայտարարությունից: Մարդիկ տեսան, որ Հայաստանում զրոյացման աշխատանք է տարվում, արտասահմանյան լրտեսներ, խուզարկուներ և Թուրքիայի հետ բանակցություններ և եկանք հասանք այն օրվան, որ եթե զրոյից է սկսում, ուրեմն բանակցություն չկա: Ալիևը սպասում էր բանակցության և տեղի ունեցավ Դուշանբեի հայտնի առեղծվածը, որ ոչ թե բանակցություն էր, այլ բազար, երկու հոգու մեջ ղումարբազի բազար էր գնում»,- ասաց նա:
Նա նշեց, որ պատերազմից առաջ ՀՀ երկու նախագահները, հերոսները դատարան կանչվեցին, իսկ այդ ամենին Թուրքիան հետևում էր.
«Ռոբերտ Քոչարյան, Սերժ Սարգսյան, մեր երկրի հերոսները, Արցախն ազատագրողներն օտարվեցին, քաշվեցին դատի, ամեն ինչ Թուրքիայի հեռադիտակի տակ էր կատարվում, մինչև եղավ իր բուն մասնակցությունը պատերազմի ժամանակ և ասում էր՝ ահա բուն պահն է գալիս, որ մտնեմ Անդրկովկաս, Կովկաս և հայտարարեց, ասաց՝ իմ նախկինների կիսատ թողածը ավարտեմ»:
Անդրադառնալով պատերազմական գործողություններին և պարտությանը՝ նշեց.
«Գեներալների մեջ ո՞ւր էր Խաչատուրովը, Արկադի Տեր- Թադևոսյանը, Բալասանյանը նոր է գնացել, չգիտեմ՝ ինչ պետք է կարողանա անել, Սեյրան Օհանյանին վերջում թողեցին գնա, որ ծիծաղելի բան առաջ բերեն, թե գեներալներին բերեցինք, բան չկարողացան անել»: