Թուրքմենստանում, որտեղ պաշտոնական տվյալներով կորոնավիրուս չկա, հանձնարարել են սկսել պատվաստումները

Նախագահ Գուրբանգուլի Բերդիմուհամեդովը վարակիչ հիվանդությունների դեմ պայքարի շրջանակում Թուրքմենստանի առողջապահության նախարարին մի շարք հանձնարարականներ է տվել, այդ թվում` երկրի քաղաքացիներին պատվաստանյութերով ապահովելը: Այս մասին գրում է «ՌԻԱ Նովոստի» գործակալությունը՝ հղում տալով «Նեյտրալ Թուրքմենստան» հրատարակությանը:

Պետության ղեկավարը հանձնարարականները տվել է կառավարության նիստում, որտեղ զեկույցով հանդես է եկել Թուրքմենստանի առողջապահության և բժշկական արդյունաբերության նախարար Նուրմուհամեդ Ամաննեպեսովը:

Նախարարը խոսել է երկրում վարակիչ հիվանդությունների կանխարգելման համապարփակ միջոցառումների իրականացման մասին:

Զեկույցը լսելուց հետո Բերդիմուհամեդովը մատնանշել է վարակիչ հիվանդությունների դեմ պայքարի և կանխարգելման հետագա աշխատանքների կարևորությունը, հատկապես կապված գարուն-ամառ առաջիկա սեզոնի հետ: Թուրքմենստանի ղեկավարը նախարարին հանձնարարել է շարունակել ԱՀԿ-ի կողմից հաստատված դեղամիջոցների և պատվաստանյութերի գրանցումը:

Թուրքմենստանի ղեկավարը հանձնարարել է նաև խստորեն վերահսկել կանխարգելիչ միջոցառումների 3 կանոնների պահպանումը. բժշկական դիմակների կրումը մինչև ժամկետը լրանալը, դրանց համապատասխանությունը միջազգային չափանիշներին և բացատրական աշխատանքները բնակչության շրջանում:

«Ուշադրություն դարձնելով արտասահմանում սովորելու մեկնող քաղաքացիների և թուրքմեն ուսանողների՝ այդ պետություններում օգտագործվող պատվաստանյութի համապատասխանությամբ պատվաստումների, Թուրքմենստան ժամանող օտարերկրյա քաղաքացիների պատվաստումների վկայագրերի տրամադրման, ինչպես նաև մեր երկրի քաղաքացիներին պատվաստանյութերի տրամադրման վրա, Գուրբանգուլի Բերդիմուհամեդովը համապատասխան ղեկավարներին հասցեագրել է մի շարք հանձնարարականներ»,-նշում է հրատարակությունը:

Իշխանությունների տեղեկությունների համաձայն, Թուրքմենստանում COVID-19- ի դեպքեր չեն գրանցվել: Միևնույն ժամանակ, երկիրը սահմանել է դիմակային ռեժիմ և մի շարք սահմանափակումներ տրանսպորտի, առևտրի, սննդի, սպասարկման և այլնի գործունեության նկատմամբ: