Օրացույցում այսօր տոնական օր է, Հայոց բանակի 29-րդ տարեդարձը. Սակայն մեր տրամադրություններն ու զգացողությունները տոնական չեն. Արկադի Ալեքյան
Գերմաներեն լեզվի դասախոս, լրագրող-քաղաքական վերլուծաբան Արկադի Ալեքյանի ուղերձը Հայոց Բանակի 29-րդ տարեդարձի առթիվ.
«Սիրելի՛ հայրենակիցներ,
Օրացույցում այսօր տոնական օր է, Հայոց բանակի 29-րդ տարեդարձը: Սակայն մեր տրամադրություններն ու զգացողությունները տոնական չեն:
44 օրյա արցախաադրբեջանական ագրեսիվ պատերազմը պատճառեց մեզ ցավ, վիշտ, կորուստ: Պատերազմում կորսված կյանքերը, այսօր գերության մեջ գտնվող հայ զինվորները, դեռ մինչև օրս անհետ կորածները, հաշմանդամություն ձեռք բերած տղաները, սգավոր մայրերի դառնագին վիշտը, այրիացած կանանց թախիծը և մարդկային աղճատված ճակատագրերը դաժան իրողությունների առաջ են կանգնեցրել մեր ժողովրդին:
Բայց, հանուն մեր պետականության, հանուն մեր Հայոց պատմության, հանուն մեր Հայոց լեզվի և գրականության, հանուն հայ ժողովրդի, հայ ազգի գոյության, որն ունի դարավոր պատմություն, որը միշտ հաղթանակներ է կերտել, պետք է վերածնվենք, լինենք միասնական, դառնանք մի բռունցք և հաղթահարենք այսօրվա ծառացած խոչընդոտներն ու դժվարությունները: Այսօր և մշտապես յուրաքանչյուրս պետք է լինենք անմնացորդ և նվիրյալ բանակին, սատար կանգնենք զինվորի կողքին, քաջալերենք մեր ոգեշնչող խոսքերով: Հույսներս չկորցնենք վաղվա օրվա հաղթանակի բերկրանքի զգացումից:
Այսօր Արցախը կարծես լքված որբի է նմանվել, բայց Մայր Հայաստանը երբե՛ք չի թողնի քեզ բարձիթողի, մի՛շտ քեզ հետ է, չէ՞ որ քո հողը, հանուն թշնամուց պաշտպանելու համար, հայ զինվորի արյունով է ծառավդ հագեցրել: Եվ այդ սուրբ հողից ու քարից հայ ժողովուրդս արարել ու ստեղծել է իր հանապազօրյա հացը:
Ուղղի՛ր մեջքդ, Հայոց բանակ, բազում դժվարություններ ես հաղթահարել, դու չե՛ս պարտվել, քեզ թշնամին չի՛ հաղթել, հիշի՛ր, դու կռվել ու դիմակայել ես մի քանի պետությունների դեմ, և ցավոք, քեզ նաև ներսից են դավել:
Շնորհավոր տոնդ, Հայո՛ց բանակ, հայրենիքին նվիրյալ Հայ զինվոր, և իրոք զինվորական կոչմանն արժանավույն՝ գեներալներ և սպաներ:
Խոնհարումս նահատակված բոլոր զինվորների շիրիմներին, որոնք հանուն Հայրենիքի զոհվեցին: Հավերժ փա՜ռք ձեզ: Շնորհակալությունս բանակային համազգեստ կրող այն քաջ մարտիկներին, ովքեր կանգնած են այսօր սահմանին, այն սահմանին, որ մինչ այսօր էլ հստակ սահմանված չէ, բայց նրանք պատվախնդրորեն ծառայում են հանուն Հայաստանի, հանուն հայ ազգի անվտանգության և հանուն Արցախի համար:
Խաղաղություն Հայոց բանակին»: