Կանադացի միլիոնատեր զույգը կորոնավիրուսի դեմ պատվաստանյութ ստանալու համար «ստիպված է եղել» որպես մոթելի հավաքարար ներկայանալ
Կորոնավիրուսի բռնկումից հետո աշխարհը «խելագարվել» է: Հիմա բոլորը պատվաստվելու իրենց հերթին են սպասում, բայց թվում է նաև, որ ավելանում է բոլոր այն մարդկանց թիվը, որոնք ցանկանում են խախտել հերթը և առաջ շարժվել, գրում է luxurylaunches.com-ը՝ նշելով, որ նման մտածելակերպով է առաջնորդվել նաև մի կանադացի միլիոնատեր զույգ:
Կայքը հայտնում է՝ խաղատան տնօրենը և նրա դերասանուհի կինն այնքան շահագրգռված են եղել հակակորոնավիրուսային պատվաստանյութը ստանալու հարցում, որ չեն կարողացել սպասել իրենց հերթին և որոշել են ներկայանալ որպես մոթելի հավաքարարներ՝ կորոնավիրուսի պատվաստանյութ ստանալու համար, որը նախատեսված է եղել տեղացիների համար:
Նպատակն իրագործելու համար 55-ամյա Ռոդնի Բեյքերը և նրա 32-ամյա կինը՝ Եկատերինա Բեյքերը, ինքնաթիռով թռչել են Յուքոն նահանգի Բիվեր Քրիքի փոքր համայնք՝ ստանալու Moderna ընկերության հակակորոնավիրուսային պատվաստանյութի անհրաժեշտ չափաբաժինները:
Նշենք՝ Բիվեր Քրիքը մոտ 100 բնակիչ ունեցող համայնք է, որը գտնվում է Ալյասկայի սահմանի մոտ, Ուայթհորսից մոտավորապես 450 կիլոմետր հյուսիս-արևմուտք: Տեղի շարժական կլինիկայի անդամները պատվաստանյութի չափաբաժինները ներարկել են 100 բնակչի, որոնք մեծ մասամբ տեղացիներ են եղել: Այնուամենայնիվ, երբ հասել է զույգի հերթը, նրանք կասկած են հարուցել բժիշկների մոտ, երբ պատվաստվելուց հետո խնդրել են միանգամից իրենց օդանավակական տեղափոխել:
Այս առնչությամբ հայտարությամբ է հանդես եկել Յուքոնի համայնքային ծառայությունների նախարար Ջոն Սթրայքերը:
«Նրանք իրենց այդ քայլով վտանգի տակ են դրել մեր համայնքին և պատվաստող թիմին: Ես բարկացած եմ տեղի ունեցածի համար: Մենք չէինք կանխատեսում, որ ինչ-որ մեկը կգնա նման քայլի, որով կխաբի թիմին: Ես կարծում եմ, որ մենք բոլորս մեզ վիրավորված էինք զգում»,- շեշտել է նա:
Ըստ Յուքոնի քաղաքացիական արտակարգ իրավիճակների միջոցառումների մասին օրենքի՝ զույգին մեղադրանք է առաջադրվել: Վերջիններս խախտել են երկրում գործող կարգը, այն է՝ պարտադիր ինքնամեկուսացում, ինչպես նաև չեն ենթարկվել ճանապարհորդական հայտարարագրով սահմանված դրույթներին:
Նրանցից յուրաքանչյուրին սպառնում է տուգանք մինչև 1150 ԱՄՆ դոլարի չափով կամ մինչև վեց ամսվա ազատազրկում:
Հիշեցնենք՝ Moderna տեսակի պատվաստանյութը ստեղծել է աշխարհահռչակ հայ գործարար Նուբար Աֆեյանի հիմնադրած Moderna Therapeutics կենսատեխնոլոգիական ընկերությունը: Պատվաստանյութի օգտագործումը թույլատրված է մի շարք երկրներում, այդ թվում՝ ԱՄՆ-ում և Մեծ Բրիտանիայում: Նոյեմբերի 16-ին Moderna-ն հայտարարել է կորոնավիրուսի պատվաստանյութի՝ մոտ 95 տոկոս արդյունավետության մասին: