Հիմա արտահերթ ընտրություն անցկացնելը երկրի համար վտանգավոր է, սակայն եթե լինեն ընտրություններ, ապա մասնակցելու ենք և հաղթելու ենք. Ռոբերտ Քոչարյան (տեսանյութեր)
ՀՀ երկրորդ նախագահ Ռոբերտ Քոչարյանը կմասնակցի արտահերթ ընտրություններին, եթե իշխանությունն, այնուամենայնիվ, այս մթնոլորտում կազմակերպի արտահերթ ընտրություններ:
Այս մասին երեկ 3 լրատվամիջոցների ներկայացուցիչների՝ Անժելա Թովմասյանի (hayeli.am), Սևակ Հակոբյանի (Yerevan-today) և Բորիս Մուրազիի (politik.am) հետ հարցազրույցում ասել է ՀՀ երկրորդ նախագահ Ռոբերտ Քոչարյանը:
Հարցին, թե ապագայում ինչ գործընթացներին է մասնակցելու ինքը, Ռոբերտ Քոչարյանն ասաց, որ իր կողմնակիցներին կոչ է արել ակտիվ մասնակցել քաղաքական գործընթացներին, որը և անում են, իսկ ինչ վերաբերում է իր` ավելի ակտիվ մասնակցությանը, ապա «Իմ քայլը» իրեն երկու տարի բանտում է պահել և մտածել, որ եթե իրեն իշխանություն տան, ապա սուրը հանելու է ու աջ ու ձախ վրեժխնդիր է լինելու իրենցից, իրենց մինչև հիմա դա են «ներարկում»:
«Այդ մարդիկ այդպես են մտածում, որովհետև իրենք հավանաբար այդպիսին են, և պատճառը նաև դա է, որ ես ինձ հեռու պահեցի այս գործընթացներից, որ իմ գործոնը չօգտագործվի այդ 20-25 պատգամավորներին վախեցնելու համար: Հետագա գործողությունների մասով, եթե լինեն ընտրություններ, նայած ինչ ֆորմատով, քաղաքական պայքարի համար ամբողջ գործիքակազմն ունենք, կա նաև թիմ, ինչ վերաբերում է ընտրություններին, շատ ավելի ճիշտ կլիներ, որ վիճակը կայունացվեր ու հանգիստ միջավայրում կազմակերպվեր ընտրություններ, որովհետև այսօր արտահերթ ընտրությունները այս հակասությունների մթնոլորտում, շատ զգայուն հարցերի վերաբերյալ պատասխանների բացակայության պարագայում իսկապես վտանգավոր է, սակայն եթե ընտրություններ լինեն, իհարկե, միանշանակ եմ մասնակցելու, եթե ավելի արագ լինեն ընտրություններ, ապա չեմ կարծում, որ չմասնակցելը ճիշտ է, հակառակ դեպքում մենք այս մարդկանց հնարավորություն կտանք վերահաստատել իրենց իշխանությունը: Եթե այս մարդիկ չեն հասկանում, որ այս պայմաններում ընտրությունները վտանգավոր են երկրի համար, այնուամենայնիվ ընտրություններ անեն, ընտրություններում իրենց մենակ թողնել հանրության հետ պետք չէ, այո, մասնակցելու ենք, և հաղթելու ենք, պայքարելու ենք, և հաղթելու ենք»,-ասաց Ռոբերտ Քոչարյանը:
Հարցին, թե ինչու ընդդիմությանը չհաջողվեց փողոց դուրս բերել մարդկանց, ցասումը մարեց և չստացվեց հեռացնել Փաշինյանին, ինչու չհաջողվեց հեռացնել այդ ուժերին, Ռոբերտ Քոչարյանն ասաց, որ ինքը չի համարում, որ չի ստացվել, այլ համարում է , որ ամեն ինչ առջևում է. «Խնդիրը հետևյալի մեջ է. իշխանափոխությունը լինի լեգիտի՞մ, թե՞ հեղափոխական ճանապարհով: Առաջին շաբաթվա այլընտրանքը դրա մեջ էր, եթե մարդիկ մի քիչ սեր ունենային, ամոթի զգացում, պետք է ներողություն խնդրեին ու հրաժարական տային, իսկ լեգիտիմ ճանապարհը շատ հեշտ է, եթե 25 պատգամավոր մի քիչ հայրենասիրություն ունենար, դուրս կգային խմբակցությունից, և կաշխատեր այն ծրագիրը, որով կգնար 17 ուժը, սակայն պատգամավորները չարեցին: Իշխանությունը պետք է ուրախ լինի, որ կա նման քաղաքական պրոցես, որովհետև եթե դրա նկատմամբ հույսը կորի, այլ պրոցեսներ են ի հայտ գալու»:
Ռոբերտ Քոչարյանի խոսքով՝ 17 քաղաքական ուժ փորձել է Նիկոլ Փաշինյանին հեռացնել լեգիտիմ ճանապարհով և չի ստացվել, գործոններ եղել են, որ բավարար զանգված դուրս չի եկել, բայց գայթակղությունը գնալ սահմանադրական ճանապարհով, մեծ էր. «Ես ուղղակի ներգրավված չեմ, բայց որքան հասկանում եմ, այս գործընթացը շարունակվելու է. և դրա համար է, որ իշխանությունը սկսեց խոսել արտահերթ ընտրությունների մասին»:
Ըստ Քոչարյանի՝ անցած ժամանակահատվածում էլի մի շարք բացահայտումներ եղան, որոնք ավելի մեծ կասկածներ առաջացրեցին, թե ինչու մենք այսպիսի պարտություն ունեցանք։ Եվ դա գումարվեց այն հանգամանքին, որ այն ժամանակ հնչեցված փաստերին, որևէ ողջամիտ բացատրություն մենք չենք ստացել։
«Եվ սա՛ է ստեղծում այն մթնոլորտը, որի պատճառով քաղաքացիների շրջանում բազմաթիվ հարցեր են առաջանում, որոնք անպատասխան են մնում պետական մարմինների կողմից։ Սա, իհարկե, մեծ պրոբլեմ է։ Այսպիսի մի դիլեմա է առաջանում յուրաքանչյուր մարդու համար․ վարչապետը, իշխանությունն արեցին ամեն ինչ պատերազմ ունենալու համար կամ չարեցին ոչինչ պատերազմը կանխելու համար։ Եվ երկրորդը․ վարչապետը, իշխանությունը արեցին ամեն ինչ պատերազմում պարտվելու համար եւ չարեցին ոչինչ պատերազմում չպարտվելու համար։ Երբ քաղաքացին այսպիսի դիլեմայի առջեւ է կանգնում, իհարկե, սա նորմալ վիճակ չէ, եւ քաղաքական դիսկուրսը երկրում, քննակումները գնում են այն ուղղությամբ, թե ինչ չափով է այդ կասկածը պրեյոկտվում մեր իրավիճակի վրա։ Կրկնեմ՝ այն ժամանակվանից բազմաթիվ հարցեր ավելացան, որոնք մնացին անպատասխան», ասել է Ռոբերտ Քոչարյանը։
Դուք ունե՞ք պատասխանը, հարցին, ՀՀ նախկին նախագահն ասել է․ այնքան շատ են սխալները, որ ինքը կարծում է՝ մեկ մարդու համար, մեկ պատերազմի համար դրանք չափից դուրս շատ են։
«Ես կառաջարկեի այդ հարցին նայել այլ անկյան տակ․ իսկ ինչն է ճիշտ արվել, որպեսզի չունենանք պատերազմ եւ չպարտվել այդ պատերազմում։ Այս 2,5 ամսվա մեջ որեւէ մեկը չի ասել, թե ինչն է ճիշտ արել այս վարչապետը, այս իշխանությունը այս վիճակում չհայտնվելու համար։ Ասում է՝ 30 տարի, եւ այլն, եւ այլն, բայց կոնկրետ այս ընթացքում ի՞նչն է ճիշտ արվել։ Եվ սա ուղղակի ապշեցնում է։ Գիտեք, կյանքում չի լինում, որ ենթադրվող բազմաթիվ քայլերից, նույնիսկ պատահաբար դու մեկ ճիշտ քայլ չես անում։ Ուղղակի հիշեցնենք մեր ժողովրդին, խոսքը մի շարք բաների մասին է․ դիվանագիտական ձախողում, գործընթացը փակուղի մտցնել, հրահրել Թուրքիային, Ադրբեջանին, քայլերով միավորել նրանց մեր դեմ, պատերազմի ժամանակ մարտական ճանապարհ անցած փորձառու հրամանատարների չեզոքացում, կանոնավոր բանակից անցում ջոկատների, այս ամենը քննարկվել է եւ շարունակում է քննարկվել մինչեւ օրս։ Եվ կրկնեմ, օգնեք ինձ ասել՝ ո՞ր քայլն է եղել ճիշտ, այս վիճակում չհայտնվելու համար», նշել է Ռոբերտ Քոչարյանը։
Դավաճանությո՞ւն էր, թե՞ անպարաստության, անփութության հետեւանք, հարցին ի պատասխան, Ռ․Քոչարյանն ասել է․
«Փաստացի ի՞նչ ունենք մենք այսօր․ ձայնագրությունից նկատելի է, որ այդպիսի թեմա եղել է (նկատի ունի Լուկաշենկոյի կողմից Սերժ Սարգսյանին Ալիեւի կողմից 5 մլրդ դոլար առաջարկելը Արցախի անվտանգության գոտուց հրաժարվելու դիմաց՝ NEWS.am), քննարկումներ եղել են, մերժում եղել է։ Հայտնի դարձավ նաեւ, որ այս նոր իշխանությունը այս կարգի խոսակցության մեջ մտել է Ադրբեջանի հետ, հայտնի պաշտոնյա, հանդիպում Դուբայում, փաստացի եղել է։ Եվ մենք չգիտենք՝ այդ առաջարկն ընդունվե՞լ է, թե՞ մերժվել։ Մենք ունենք այդպիսի խոսակցություն, որը հաստատված է եւ անհերքելի, եւ ունենք արդյունք, խոսքը տարածքների դիմաց 5 միլիարդի մասին էր, ունենք կորցրած տարածնքեր, որոնց մասին խոսվում էր՝ 5+2, հիմա մի բան էլ ավելի կորուստ ունենք։ Հիմա ես չունեմ փաստեր՝ հայտնաբերելու, ապացուցելու համար այդ կապը, հետեւանքի եւ առաջարկի միջեւ, բայց մենք ունենք իրավապահ մարմիններ, եթե ունենք պետություն, ապա այդ կապը պետք է կամ հերքվի կամ հաստատվի։ Դա կարելի է անել լայնածավալ եւ պրոֆեսիոնալ հետաքննությամբ։ Իսկ քանի որ իշխանությունը մերժում է որեւէ նույնիսկ ուսումնասիրություն, մերժում է փաստահավաք խմբի ձեւավորումը, ուրեմն ՀՀ յուրաքանչյուր քաղաքացի իրավունք ունի մտածելու, որ այդպիսի գործարք եղել է, այնքան ժամանակ, քանի դեռ դա չի հերքվել։ Պարզ է, որ այս իշխանության օրոք դա հնարավոր չի անել, իշխանությունը պետք է փոխվի, եւ քաղաքացիները իմանան՝ ինչ է կատարվել իրականում»։
Դա այն հարցերից մեկն է, որի պատասխանն այսօր չկա, ասել է երկրորդ նախագահը անդրադառնալով հարցին, որ ԶՈՒ ԳՇ պետը պատերազմի չորրորդ օրը զեկուցել է պատերազմը շարունակելու անհնարինության մասին, իսկ պատերազմը հաջորդող օրերին այդպես էլ չի կանգնեցվում։
«Դա առաջացնում է մեծ կասկածներ, որ եղել է նման գործարք, եղել են ստվերային պայմանավորվածություններ, եւ մարդիկ իրավունք ունեն կասկածներ ունենալ։ Եվ նրանց արձագանքից էլ կարելի է դատել, թե ինչ վերաբերմունք ունեն վարչապետի նկատմամբ․/ եթե համակրում է, ասում է՝ չի եղել գործարք, իսկ ովքեր չեն համակրում, իսկ մեծ մասն այսօր նաեւ ատում է, հավատում է այդ ամենին։ Սա նորմալ վիճակ չէ, որ հանրությունը պետք է ապրի այսպիսի մտորումներով։ Ստեղծվում է տպավորություն, որ ամեն մեկը կարող է մտածել, որ սա եղել նախօրոք պարտությունը պլանավորած պատերազմ։ Այդպիսի ողջամիտ կասկած փաստերի այսպիսի համադրումով, առաջանում է», նշել է Ռոբերտ Քոչարյանը։
Մանրամասները՝ տեսանյութերում: