Իրանը հայտարարել է Ադրբեջանի տնտեսական նախագծերին ակտիվ մասնակցության պատրաստակամության մասին

Իրանը հայտարարել է Ադրբեջանի տնտեսական նախագծերին երկրի տնտեսական հատվածների ակտիվ մասնակցության պատրաստակամության մասին՝ ընդգծելով, որ Թեհրանը Բաքվի հետ համագործակցության համար ոչ մի սահմանափակում չի դիտարկում: Այս մասին հայտարարել է Իրանի ԱԳ նախարար Մոհամմադ Ջավադ Զարիֆը իր ադրբեջանցի գործընկեր Ջեյհուն Բայրամովի հետ հանդիպմանը, փոխանցում է Mehr-ը:

Հանդիպման ժամանակ կողմերը քննարկել են տարբեր ոլորտներում երկու երկրների համագործակցությունը, ինչպես նաեւ տարածաշրջանային հարցեր: Զարիֆը գոհունակություն է հայտնել Ադրբեջան իր այցի հետ կապված «օկուպացված տարածքների ազատագրումից հետո եւ հարգել պատերազմում զոհվածների հիշատակը՝ նոր փուլը կարեւոր պահ անվանելով տարածաշրջանում խաղաղության ու կայունության հաստատմանը նպաստելու համար եւ ի բարօրություն բոլոր կողմերի»:

Տարածաշրջան իր այցի նպատակը ներկայացնելով որպես խաղաղություն եւ անդորր հաստատելու փորձ՝ նա գոհունակություն է հայտնել վերջին ամիսներին Ադրբեջանի եւ Իրանի պաշտոնատար անձանց միջեւ հանդիպումների ակտիվացմամբ:

Զարիֆը հայտարարել է «երկու երկրների ընդհանուր սահմաններին տեղակայված ազատագրված տարածքների» վերականգնման ակտիվ եւ լայն մասնակցության Իրանի պատրաստակամության մասին: Նա նշել է Տնտեսական համագործակցության հարցերով համատեղ հանձնաժողովի վերջին նիստում երկու երկրների միջեւ արգասավոր բանակցությունները՝ նկատելով, որ այսօրվա հանդիպմանը Ադրբեջանի նախագահի արտահայտած կարծիքը վկայում է երկու երկրների համագործակցելու լուրջ վճռականության մասին:

Նշելով, որ Իրանը երկու երկրների միջեւ համագործակցության ոչ մի սահմանափակում չի դիտարկում՝ Զարիֆը հայտարարել է, Իրանի տնտեսության տարբեր հատվածների բազմակողմանի պատրաստակամության մասին՝ ակտիվորեն մասնակցելու Ադրբեջանի տնտեսական նախագծերին:

Իրանի արտգործնախարարը տարածաշրջանում անդորրի եւ խաղաղության հաստատումը բնորոշել է որպես երկու երկրների միջեւ համագործակցության հրաշալի հնարավորություն տարանցման եւ Արեւելք-Արեւմուտք ու Հյուսիս-Հարավ միջանցքների ակտիվացման ոլորտում:

Կողմերը քննարկել են երկու երկրների համագործակցությունը Կասպիական տարածաշրջանում, մշակույթի հարցեր, ջրային ռեսուրսների, տրանսպորտի եւ միջազգային գործերի ոլորտում համագործակցությունը, ինչպես նաեւ Թուրքիայի հետ եռակողմ համագործակցությունը:

Իրանի ԱԳ նախարարը նաեւ հանդիպել ու բանակցություններ է անցկացրել Ադրբեջանի նախագահ Իլհամ Ալիեւի հետ:

Ալիեւը ողջունել է իրանական ընկերությունների մասնակցությունը «Ղարաբաղի ազատագրված շրջաններում» վերականգնմանը: