Գիտնականներին առաջին անգամ հաջողվել է ստանալ իրական կորոնավիրուսի եռաչափ պատկերը (տեսանյութ)

Չինաստանի Ցինգուա համալսարանի, Nanographics ավստրիական ընկերության և Սաուդյան Արաբիայի թագավոր Աբդուլլահի անվան գիտության և տեխնոլոգիայի համալսարանի մասնագետներին առաջին անգամ հաջողվել է ֆիքսել COVID-19 վիրուսի իրական եռաչափ պատկերը: Այս մասին հայտնում է South China Morning Post-ը:

Նշվում է՝ գիտնականներին հաջողվել է արդյունահանել, սկանավորել և թվայնացնել SARS-CoV-2 վիրուսի մասնիկները նմուշներում: Միևնույն ժամանակ գիտնականներին հաջողվել է նաև հնարավորինս լավ պահպանել վիրուսի նմուշների պեպլոմերները (սպիտակուցային միացություններ,-Tert.am) դրանց կառուցվածքում:

Ներկայացված եռաչափ պատկերը ցույց է տալիս նաև կորոնավիրուսի՝ մարդկային բջիջներ ներխուժելու գործընթացը: Մասնավորապես, ֆիքսվել է այն պահը, երբ կորոնավիրուսը միացել է ընկալիչին և միաձուլվել բջջային թաղանթի հետ:

Մասնագետները հուսով են, որ կորոնավիրուսի եռաչափ պատկերը կդառնա այն գիտական ապացույցը, որը հասարակության որոշ մասի համար կհաստատի վիրուսի գոյությունը, քանի որ որոշ երկրներում դեռևս կան այնպիսի մարդիկ, որոնք կասկածի տակ են դնում այն: