Ես նման բան չեմ լսել. Գուցե ուրիշ առիթով ինչ-որ բաներ խոսվել է, բայց ոչ այդ օրը. ՀԲԸՄ Ֆրանսիայի և ՀԲԸՄ Եվրոպայի նախագահ Նադյա Գործունյաը Մակրոնի՝ ՀՀ իշխանություններին քննադատելու մասին

«Մակրոնն ասաց, որ Ֆրանսիան շատ մտերիմ է Հայաստանի հետ, շատ են ցանկանում օգնել և մեծ ջանքեր պետք է թափեն, որ օգնություն բերեն Հայաստան»,- «Առաջին լրատվական»-ի հետ զրույցում ասել է ՀԲԸՄ Ֆրանսիայի և ՀԲԸՄ Եվրոպայի նախագահ Նադյա Գործունյանը:

-Տիկին Գործունյան, արդյոք ներկա՞ եղել եք ֆրասնահայերի հետ Մակրոնի հանդիպմանը և ի՞նչ թեմաներ են քննարկվել: Մասնավորապես նշվում է, որ Մակրոնը խոսել է ՀՀ իշխանությունների մասին, զարմանք է հայտնել, որ ինքը պատերազմի օրերին երկու անգամ ցանկություն է հայտնել Հայաստան ուղարկել հակաօդային համակարգեր, կամ ավելի ճիշտ՝ անօդաչուների դեմ պայքարի համակարգեր, սակայն Փաշինյանը դեմ է եղել:

-Ո՛չ, այդ հանդիպմանը խոսքը վերաբերել է միայն Հայաստանին օգնություն տրամադրելուն: Մակրոնն ասաց, որ Ֆրանսիան շատ մտերիմ է Հայաստանի հետ, շատ են ցանկանում օգնել և մեծ ջանքեր պետք է թափեն, որ օգնություն բերեն Հայաստան: Դա է եղել նպատակը: Հանդիպմանը ներկա հայկական կազմակերպությունները ներկայացրեցին, թե ինչ գործունեությունը են ծավալում, մասնավորապես Բարեգործական հիմնադրամը, «Ազնավուր» հիմնադրամը և այլն: Խոսակցությունը ծավալվել այն մասին, թե ինչ է պետք Հայաստանին, ինչի կարիք ունի, և իրենք ինչ կարող են անել:

-Այսինքն՝ Հայաստանի իշխանությունների նկատմամբ Մակրոնի կողմից քննադատություն չի՞ եղել, նա չի՞ ասել, որ սպառազինություն են ուզում ուղարկել, բայց Փաշինյանը դեմ է: Նման բան հայտարարել է Դավիթ Շահնազայնաը:

-Ոչ, դա սուտ է, ես նման բան չեմ լսել: Այն օրը, երբ ես ներկա եմ եղել հանդիպմանը, նման խոսք չի եղել: Մակրոնն ասաց, որ ինքը մի քանի անգամ խոսել է Նիկոլ Փաշինյանի հետ:

-Դավիթ Շահնազարյանը բառացիորեն ասել է հետևյալը. «Հոկտեմբերի 3-ին և 11-ին, Փաշինյանը մերժել է Ֆրանսիայի առաջարկը՝ Հայաստան ուղարկել անօդաչուների դեմ պայքարի համակարգեր»:

-Ես նման բան չեմ լսել: Գուցե ուրիշ առիթով ինչ-որ բաներ խոսվել է, բայց ոչ այդ օրը:

-Իսկ ընդհանրապես, Հայաստան-Ֆրանսիա հարաբերություններն ինչպե՞ս եք գնահատում. Այս փուլում ի՞նչ անելիքներ կան:

-Ըստ էության, պատերազմի ընթացքում միայն Ֆրանսիան օգնեց Հայաստանի և մինչև հիմա օգնությամբ լի բազմաթիվ օդանավեր է ուղարկում : Անգամ Ֆրանսիան մեզ է գումար տալիս, որ մենք Հայաստանին օգնենք: Ֆրանսիան միշտ հայտարարել է, որ Հայաստանի բարեկամն է: Մենք բժիշկներ ենք ուղարկում, մարդասիրական օգնություն ենք ուղարկում: Ֆրանսիան մեզ գումար է տալիս, որ շարունակաենք այս ուղղությամբ մեր գործունեությունը:

-Ֆրանսիայի Սենատն ու Ազգային ժողովը 2020-ի վերջին Արցախի անկախությունը ճանաչող բանաձևերի ընդունեցին: Ի՞նչ կարող ենք ակնկալել այս տարի այդ ուղղությամբ, արդյոք Մակրոնի կառավարությունը կճանաչի՞ Արցախի անկախությունը, թե՞ կփորձի վերականգնել Մինսկի խմբի ձևաչափը, որի հիմքերը խարխլվել են:

-Դա ավելի շատ քաղաքական հարց է, ես չեմ կարծում, թե Մակրոնը կկարողանա ճանաչել Արցախի անկախությունը, բայց մեզ համար շատ կարևոր է, որ Ֆրանսիայի Սենարտն Ազգային ժողովը կոչ են արել Մակրոնին անել այդ քայլը: Սա նշանակում է, որ Ֆրանսիայի ժողովուրդը շատ մոտ է Հայաստանին, օգնում ու պաշտպանում է: Կարծում եմ՝ Արցախի անկախության ճանաչումը ամբողջ Եվրոպայի կողմից դիրքորոշման հետ է կապված և չեմ կարծում, թե Մակրոնն առանձին կարող է նման քայլի գնալ: