Փորձագետ. Հարկային փոփոխությունները կհանգեցնեն գնաճի առողջապահության և կրթության ոլորտներում
Նախքան առողջապահության եւ կրթության ոլորտներում ԱԱՀ-ով հարկման վճարումից ազատվելու հարցով արտոնությունների կրճատման մասին խոսերը պետք է նախ գնահատել հնարավորություններն ու զարգացման պոտենցիալն ու հետո միայն ներդնել հարկման նոր համակարգ: Այս մասին ասաց «Հարկատուների պաշտպանություն» ՀԿ ղեկավար Փայլակ Թադևոսյանը:
Նրա խոսքով՝ կարեւոր է հասկանալ, օրինակ, հարեւան երկրների համեմատ ծառայությունների գնային տարբերությունը:
«Նույնը վերաբերում է նաեւ շրջանառության հարկման եւ միկրոձեռնարկատիրությունների արտոնյալ հարկման համակարգերի վերանայման ձգտմանը: Այստեղ նաեւ անհրաժեշտ է գնահատել ռիսկերն ու կշռադատված որոշումներ կայացնել: Հօգուտ հարկային ճեղքվածքի աճի ցանկացած վերանայում հանգեցնում է նրան, որ բիզնեսը սկսում է տեղավորվել այդ շրջանակում, ստվերային տնտեսությունն առավելություններ է ստանում, բարեխիղճ տնտեսվարող սուբյեկտները կորցնում են մրցունակությունը»,-նշեց Թադեւոսյանը:
«Ընդ որում, ոչինչ չի խոսվում կրթական բարեփոխումների մասին, դրա փոխարեն բնակչության եկամուտների նվազեցման ֆոնին, ըստ էության, աճում է դրա գինը: Բացի այդ, կարեւոր է կանխատեսելիությունը , պետք է նշմարել հարկային փոփոխությունների գործողության ժամկետները: Առաջին հերթին, պետությունը պետք է հայտարարի տնտեսական ուղղությունների առաջնահերթությունների մասին, եւ դրանից ելնելով հարկային քաղաքականություն մշակի, այլ ոչ թե մի հարկատուին ազատի, մյուսին՝ ոչ, ծնելով անարդարության զգացում»,-հավելեց փորձագետը:
Նշենք, որ այս տարի ակնկալվող հարկային ճեղքվածքը նվազեցնելու նպատակով կառավարությունը մտադիր է սահմանափակել ԱԱՀ-ով հարկման ազատման արտոնությունները առողջապահական եւ կրթական ոլորտներում: Բացի այդ, կառավարությունը մտադիր է վերանայել շրջանառության հարկման եւ միկրոձեռնարկությունների արտոնյալ հարկման համակարգերը: