Եթե անգամ լինեն, ապա 1-2 հոգի կլինեն «Իմ քայլից», որ կողմ կքվեարկեն Մարուքյանի թեկնածությանը. Հրաչյա Հակոբյանը պատասխանել է մի շարք հարցերի

Արտահերթ ընտրությունների հարցով քննարկումները քաղաքական ուժերի հետ շարունակվում են, այս պահին չենք պատրաստվում շտապել այդ հարցում: Այս մասին, այսօր՝ հունվարի 20-ին, ԱԺ-ում լրագրողների հետ զրույցում նշեց ԱԺ «Իմ քայլը» խմբակցության պատգամավոր Հրաչյա Հակոբյանը՝ հավելելով, որ այս պահին իրենք չեն պատրաստվում ընտրությունների:

Հարցին, թե «Իմ քայլը» խմբակցությունում կա՞ն պատգմավորներ, որոնք վարչապետի հրաժարականի դեպքում կողմ կքվեարկեն Էդմոն Մարուքյանի թեկնածությանը վարչապետի պաշտոնում, Հրաչյա Հակոբյանը պատասխանեց. «Չեմ կարծում, որ մեր այսօրվա խմբակցությունում կան այդպիսի պատգամավորներ: Եթե անգամ լինեն, ապա շատ քիչ՝ 1-2 հոգի, որովհետեւ հիմա չեմ կարող բացառել ամեն ինչ: Ես հակված եմ մտածելու եւ ունեմ ներքին համոզմունք, որ չեն լինի այդպիսի պատգամավորներ, բայց անգամ եթե լինեն, ապա 1-2 հոգի»:

Նա չցանկացավ նշել, թե արդյոք դավաճան հրամում է «Իմ քայլից» դուրս եկած պատգամավորներին. «Թույլ տվեք չպատասխանեմ այդ հարցին, համենայնդեպս իրենց արած քայլը դրական չեմ բնորոշի, որովհետեւ տարբեր խոսակցություններ, քննարկումներ են եղել, իրենք էլ բազմիցս համարել են, որ իրենց ստացած ստացած քվեն իրենց քվեն չէ, իրենք չեն վաստակել այդ քվեն: Եվ այդ պարագայում գեղեցիկ չի, որ ինչ-որ պահից փոխում է մոտեցումը»,-ասաց Հակոբյանը, սակայն չցանկացած նշել, թե որ պատգամավորների մասին է խոսքը:

Նա հավելեց նաեւ, որ պատգամավորներին ուսապարկի հետ համեմատելը ճիշտ չի համարում:

Հարցին, թե չե՞ն պատրաստվում էթիկայի հանձնաժողով ստեղծել, որտեղ կքննեն «Իմ քայլի» պատգամավոր Հայկ Սարգսյանի վարքը, որը լրագրողից խլել էր միկրոֆոնը, նա արձագանքեց. «Եթե էթիկայի հանձնաժողով ստեղծելու մասին խոսենք, ապա մինչեւ Հայկ Սարգսյանին հասնելը կան բազմաթիվ պատգամավորներ, մեծամասամբ ընդդիմադիր խմբակցություններից, որ էթիկայի հանձնաժողով պետք է ստեղծվի իրենց համար»: