Փաշինյանին թվում է՝ եթե գոռգոռաց, կկարողանա դիմացինի «բերանը փակել», բայց դա ԱԺ-ում չի աշխատում․ Տիգրանաշենի, գերիների հարցերով նրա պատասխանները մանիպուլյացիա էին․ Ա․ Բադալյան
Նիկոլ Փաշինյանը փորձում է ցույց տալ, թե այնքան հզոր է, որ կարող է գոռգոռալով, ճղճղալով խոսել, բայց այդքան հզոր մարդը որոշ ժամանակ առաջ նույնիսկ Սյունիք չկարողացավ գնալ, կամ Եռաբլուր ոստիկանական զորքերով էր մտնում, սա էլ է նույնպես մանիպուլացիա: Այս մասին Tert.am-ի հետ զրույցում ասաց քաղտեխնոլոգ Արմեն Բադալյանը՝ անդրադառնալով այսօր Ազգային ժողովում կառավարության հետ հարց ու պատասխանի ժամանակ Նիկոլ Փաշինյանի տրված պատասխաններին:
«Նիկոլ Փաշինյանին թվում է, որ եթե գոռգոռաց, կարող է դրանով դիմացինի «բերանը փակել», բայց դա չի աշխատում, եթե դա միտինգում աշխատում է, ապա խորհրդարանում չի աշխատում»,-ասաց նա:
Ինչ վերաբերում է Տիգրանաշենի հարցի վերաբերյալ Նիկոլ Փաշինյանի ասածներին, Արմեն Բադալյանը նշեց, որ Նիկոլ Փաշինյանը չի կարող նույնիսկ որևէ երաշխիք տալ, քանի որ պարտվող կողմ է և պատրաստ է ամեն ինչ ստորագրել, նույնիսկ չգիտի՝ ուզելո՞ւ են Տիգրանաշենը, թե ոչ: «Շատեր են խոսում, որ Ադրբեջանը պահանջում է Տիգրանաշենը, բայց նրան ավելի շատ հետաքրքում է Մեղրու միջանցքը, ինքն այդ ուղղությամբ է աշխատում և տեսնում ենք՝ հաջողություն է ունենում: Դրա համար ասել, որ Տիգրանաշենը հերոսաբար պահպանում ենք, դա մանիպուլացիա է»,-ասաց նա:
Անդրադառնալով գերիների հարցի վերաբերյալ Նիկոլ Փաշինյանի տված պատասխանին, որ նախկինում այսքան շատ մեծ գերիներ չեն վերադարձվել, Արմեն Բադալյանը նախ նկատեց, որ դա բնական է, քանի որ նախկինում այսքան մեծ պարտություն չէինք կրել և այսքան շատ գերիներ չէին հայտնվել Ադրբեջանում: «Սա ևս էժանագին մանիպուլացիա է: Մանիպուլացիան էլ պետք է լինի այնպես, որ չհասկացվի, բայց այս դեպքում բացահայտ հիմարի տեղ են դնում»-ասաց նա և նշեց, որ Նիկոլ Փաշինյանը գերիներին չի էլ ազատել, դա արել է ռուսական կողմը:
Ըստ քաղտեխնոլոգի` Փաշինյանն այս պահին չի կարող ցույց տալ, որ գնում է հրաժարականի: «Ինքը պետք է ցույց տա, որ չի պատրաստվում հրաժարական տալ, քանի որ եթե ցույց տվեց, որ պատրաստվում է հեռանալ, հինգ րոպե հետո իր մոտ մարդ չի լինելու, իր թիմակիցները մի մասը ուղղակի կվազի ընդդիմադիրների մոտ, մի մասը տանից դուրս չի գա, և դրա համար է ցույց տալիս, որ 100 տոկոսանոց մնացող վարչապետ է»,-ասաց նա և նշեց, որ հիմա ավելի շատ կուլիսային քաղաքականությունն է Հայաստանում գործում, քան հրապարակային քաղաքականությունը: