Ուզում եք ասել 90 տոկոս և ավելի ադրբեջանական բնակչություն ունեցող Շուշին հայկակա՞ն էր իր այդ կարգավիճակով. Փաշինյանի աբսուրդին հասնող հայտարարությունը, թե 2020 թ. պատերազմից առաջ Շուշիում ադրբեջանցիներ են ապրել

Մենք հնարավորություն չենք ունեցել դադարեցնել պատերազմը պակաս տարածքային կորուստներով: Այդ մասին հունվարի 20-ին ԱԺ նիստի ժամանակ հայտարարել է Հայաստանի վարչապետ Նիկոլ Փաշինյանը՝ պատասխանելով ԲՀԿ-ական պատգամավոր Նաիրա Զոհրաբյանի դիտարկմանը, թե հնարավոր էր ավելի վաղ եւ ավելի պակաս կորուստներով դադարեցնել պատերազմը:

Վարչապետի խոսքով՝ այդպիսի խոսակցությունները միֆ են: Հիշեցնենք, որ ավելի վաղ եւ պակաս կորուստներով պատերազմը դադարեցնելու մասին խոսել է նաեւ ՌԴ նախագահ Վլադիմիր Պուտինը:

«Մենք ձեռնարկել ենք մի շարք քայլեր, որպեսզի դադարեցնենք պատերազմը հնարավորինս արագ: Հոկտեմբերի 12-ին Մոսկվայում ստորագրվել է հրադադարի եւ բանակցությունները ԵԱՀԿ Մինսկի խմբի ձեւաչափով շարունակելու մասին համաձայնագիր, սակայն դրա պայմանները խախտվել էին: Երեք անգամ մենք փորձել ենք հրադադարի պայմանավորվածություն ձեռքբերել, սակայն, ապարդյուն»,-ընգծել է Փաշինյանը:

Ընդ որում՝ նա հավելել է, որ բանակցությունների ընթացքում չի քննարկվել որեւէ տարբերակ, ըստ որի՝ Ադրբեջանից փախստականները չպետք է վերադառնային Շուշի:

«Ցանկանում եմ ձեր ուշադրությունը հրավիրել առ այն, որ նախքան ազատագրումը Շուշիի բնակչության 90 եւ ավելի տոկոսը կազմել են ադրբեջանցիները: Այսինքն՝ դուք ուզում եք ասել, որ 90 եւ ավելի տոկոս ադրբեջանցի բնակչություն ունեցող Շուշի քաղաքը հայկակա՞ն էր իր այդ կարգավիճակով: Եւ մեկ էլ ասում եք, որ հայտարարել ես, որ Արցախը Հայաստան է, եթե դուք համարում եք, որ Արցախը Հայաստան չէ եւ դա ձեր դիրքորոշումն է, ուրեմն ձեւակերպեք այդ դիրքորոշումը եւ պաշտոնապես արձանագրեք»,- ասաց Փաշինյանը:

Այդուհանդերձ, նա խոստովանել է, որ պատասխանատու է ստեղծված իրավիճակի համար:

«Ես առ այսօր պատասխանատվություն եմ կրում տեղի ունեցողի համար: Քանի որ ամեն ինչ չի ավարտվել նոյեմբերի 9-ին: Այդ բոլոր գործընթացների հետեւանքները շարունակվում են առ այսօր: Ինձ համար ամենահեշտ գործը հրաժարական տալն էր, սակայն դա կլիներ անպատասխանատու: Ես եւ իմ քաղաքական թիմը պատասխանատվություն ենք կրում մեր բոլոր քայլերի համար»,-ընդգծել է վարչապետը:

Այդուհանդերձ, Փաշինյանը բաց չի թողել հնարավորությունը պատգամավորներին առաջարկելու ստուգել իշխանությունների լեգիտիմությունն արտահերթ խորհրդարանական ընտրություններ անցկացնելու միջոցով:

Այդուհանդերձ, Փաշինյանը պնդել է, որ, թեպետ պատասխանատու է, սակայն բնավ մեղավոր չէ: