Սերբիայում ռադիոկտիվ ռումբերից տուժածների անունից դատական հայցեր կներկայացվեն ընդդեմ ՆԱՏՕ-ի
Սերբիայում չորեքշաբթի օրը ՆԱՏՕ-ի դեմ առաջին դատական հայցերը կներկայացվեն 1999 թվականին ուրանային ռմբակոծության հետևանքով տուժած անձանցից: Այս մասին «ՌԻԱ Նովոստի» գործակալությանը տեղեկացրել է փաստաբան Սրջան Ալեքսիչը:
Փաստաբանը մի քանի տարի աշխատել է ապացույցներ հավաքելու ուղղությամբ: Նա շեշտում է, որ Սերբիայում առաջին անգամ մեղադրանքներ են առաջադրվելու ՆԱՏՕ-ին ՝ որպես իրավաբանական անձի, ֆիզիկական անձանց անունից:
«Մենք չորեքշաբթի դատական հայցեր ենք ներկայացնում Բելգրադ, Նովի Սադ, Կրագուևաց, Նիշ և Վռան քաղաքների դատարաններում: Խոսքը բարձրագույն դատարանների մասին է, որտեղ 5 հայց ենք ներկայացնելու: Տուժածները ֆիզիկական անձինք են ՝ Հարավսլավիայի Դաշնային Հանրապետության զոհված ու հիվանդացած զինծառայողներ և ոստիկաններ, որոնք Կոսովոյում էին 1999 թվականին: Առաջին փուլում մենք ցանկանում ենք, որ սրանք նույնական դեպքեր լինեն, ինչպես իտալացի զինվորականների դեպքում », - գործակալության հետ զրույցում ասել է փաստաբանը:
Ինչպես որ փոխհատուցում է տրամադրվել արևմտաեվրոպական այն զինծառայողներին, որոնք ճառագայթման վտանգավոր չափաբաժին էին ստացել ՆԱՏՕ-ում ռադիոակտիվ զինամթերքի պաշարների մոտակայքում և դրանց օգտագործման վայրերում ծառայելիս, Ալեքսիչը նախատեսում է փոխհատուցում ստանալ նաև սերբ տուժածներից յուրաքանչյուրի համար առնվազն 300 հազար եվրոյի չափով: Ալեքսիչին օգնում է իտալացի փաստաբան Անջելո Ֆիորե Տարտալիան, որը հաջողությամբ ներկայացրել է իտալացի զինվորականների շահերը:
«Նա ունի դատարանի 181 որոշում, որոնք արդեն ուժի մեջ են մտել Եվրոպայում: Նա կլինի իմ փաստաբանների թիմի անդամ, մենք գրանցել ենք նրան Նիշի փաստաբանների պալատում: Մենք ունենք ավելի քան 3000 էջ նյութեր, ներառյալ դատավճիռները, փորձագիտական եզրակացությունները, Իտալիայի կառավարության հատուկ հանձնաժողովի նյութերը: Մենք հավաքել ենք բավարար ապացույցներ, որպեսզի Սերբիայում դատարանների որոշումը մեր օգտին լինի»,-ասել է սերբ իրավաբանը:
1999 թվականին Կոսովոյի ազատագրական բանակի ալբանացի անջատողականների և սերբական բանակի ու ոստիկանության զինված բախումը հանգեցրել է ՆԱՏՕ-ի ուժերի կողմից Հարավսլավիայի Դաշնային Հանրապետության ռմբակոծմանը (այն ժամանակ կազմված էր Սերբիայից և Մոնտենեգրոյից): ՆԱՏՕ-ի ավիահարվածները շարունակվել են 1999 թվականի մարտի 24-ից հունիսի 10-ը: