ԱՄՆ պետքարտուղարի թեկնածուն Թուրքիային «այսպես կոչված դաշնակից» է անվանել

ԱՄՆ պետքարտուղարի թեկնածու Էնթոնի Բլինկենը հայտարարել է, որ որպես ՆԱՏՕ-ի դաշնակից՝ Թուրքիայի կողմից ռուսական C-400 զենիթահրթիռային համակարգերի ձեռքբերումն «անընդունելի է», փոխանցում է Ahval-ը։

«Մեր երկրի, այսպես կոչված, ռազմավարական գործընկերն իրականում կանգնած է Ռուսաստանի՝ մեր խոշորագույն ռազմավարական մրցակիցներից մեկի կողքին, դա անընդունելի է»,-հայտարարել է Բլինկենը՝ պատասխանելով հանրապետական սենատոր Լինդսի Գրեմի՝ Անկարայի կողմից C-400-ի ձեռքբերման մասին հարցին։

Սենատի արտաքին հարաբերությունների հանձնաժողովի բարձրաստիճան անդամ Բոբ Մենենդեսը խոսել է նաև տարածաշրջանում Թուրքիայի ապակայունացնող գործողությունների մասին և հիշատակել Սիրիայում Թուրքիայի քայլերը, Կիպրոսի, Լիբիայի մերձակա բացառիկ տնտեսական գոտին և վերջերս Թուրքիայի կողմից Լեռնային Ղարաբաղի պատերազմին Ադրբեջանի մասնակցությանն աջակցությունը:

Սենատորը նաև հավելել է, որ Թուրքիան այժմ բանտ է նստեցնում ավելի շատ փաստաբանների և լրագրողների, քան որևէ այլ երկիր:

«Բանն այն է, որ Թուրքիան շատ առումներով դաշնակից է, բայց չի գործում է այնպես, ինչպես պետք է գործի դաշնակիցը։ Եվ սա (ծիծաղում է- Tert.am) շատ, շատ կարևոր մարտահրավեր է մեզ համար: Եվ մենք այդ հարցում շատ հստակ դիրքորոշում ունենք»,- իր հերթին, հավելել է ԱՄՆ պետքարտուղարի թեկնածուն։

Թուրք պատմաբան Աքսել Չորլուն Twitter-ի իր էջում գրել է, որ «տարիներ շարունակ Թուրքիան հաճախ է «այսպես կոչված» արտահայտությունն օգտագործել իր քննադատներին մատնանշելու համար։ Մինչդեռ ամերիկյան դիվանագիտությունը դաշնակից երկրին հղած ուղերձում հազվադեպ է օգտագործել «այսպես կոչված» արտահայտությունը»։

Սենատի արտաքին հարաբերությունների հանձնաժողովը նախօրեին լսումներ է անցկացրել պետքարտուղարի պաշտոնում Էնթոնի Բլինկենի թեկնածության հաստատման համար: Իր ներածական հայտարարության ժամանակ Բլինկենը քննարկել Է պետքարտուղարի պաշտոնում իր առաջնահերթությունները։

Ռուսական նորագույն С-400 հակաօդային պաշտպանության համակարգերի մատակարարումը, չնայած Թուրքիա-ԱՄՆ հարաբերություններում այդ պատճառով ի հայտ եկած ճգնաժամին, մեկնարկել է 2019թ.-ի հուլիսի կեսերին: Վաշինգտոնն Անկարայից պահանջել էր հրաժարվել ռուսական ՀՕՊ համակարգերը ձեռք բերելուց և փոխարենը գնել ամերիկյան արտադրության Patriot համակարգեր՝ սպառնալով կասեցնել կամ ընդհանրապես դադարեցնել ամերիկյան նորագույն F-35 կործանիչների վաճառքը Թուրքիային: Այս ամենը, սակայն, Անկարային հետ չի պահել, և վերջինս շարունակել է բանակցությունները ռուսական կողմի հետ՝ С-400-ների լրացուցիչ խմբաքանակ ձեռք բերելու ուղղությամբ: