«Լիդիան Արմենաիա»-ն 2000-ից ավելի ջահ է ներկրել, ցանկանում ենք իմանալ, թե ինչ նպատակով պետք է դրանք օգտագործվեն. Դավիթ Անանյանը չեկավ՝ պարզաբանումներ տալու. Սերգեյ Բագրատյան
«Լիդիան Արմենիա»-ի ներկրումների հետ կապված՝ խնդիրներ կային, որոնք մենք այդպես էլ չկարողացանք բացահայտել քննիչ հանձնաժողովի աշխատանքների ժամանակ: Սա վկայում է, որ մենք քննիչ հանձնաժողովի աշխատանքները չենք կարողանում լիարժեք կազմակերպել, եթե չլինի պատկան մարմինների օժանդակությունը:
Այս մասին այսօր ԱԺ-ում լրագրողների հետ զրույցում ասաց ԲՀԿ պատգամավոր Սերգեյ Բագրատյանը՝ խոսելով իր կողմից առաջ բերված զեկույցի մասին, որը իշխանության կողմից որակվել է որպես ոչ պատշաճ աշխատանք, սակայն նրա պնդմամբ՝ աշխատանքի թերի լինելու պատասխանատուն կոնկրետ իշխանության կողմից ձևավորված կառավարության անդամն է եղել:
Բագրատյանը հիշեցրեց, որ երեկ ԱԺ-ում քննարկվում էր իր գլխավորած քննիչ հանձնաժողովի զեկույցը և զեկույցի ժամանակ վերջինս նշել է, որ նախկին ՊԵԿ նախագահ Դավիթ Անանյանին հրավիրել է մասնակցելու քննիչ հանձնաժողովի հետ կապված քննարկմանը, սակայն այդպես էլ պատասխան չի ստացել: Բագրատյանը ցույց տվեց իր հրավերի թղթային տարբերակը և շեշտեց, որ քննարկումը խիստ կարևոր էր:
«Մեզ համար կարևոր էր հասկանալ, թե «Լիդիան Արմենիա» ընկերության ծախսային մասում կան հավելագրումներ, թե ոչ: Այդ պարզաբանումը կարող էր միայն ՊԵԿ-ը տալ, որովհետև մաքսային սահմանը հատած ապրանքների մասին է խոսքը, պատասխանն այդպես էլ չստացանք և բնականաբար, դրանով արդեն չկարողացանք ապահովել տվյալ գործընթացի հավաստիությունը»,-ասաց նա:
Պատգամավորը նշեց, որ խոսքը մեկ անգամվա ներկրվող ապրանքների մասին է, որի արդյունքում մի քանի միլիարդ դրամի ծախս է եղել: Ըստ նրա՝ սա խնդրահարույց հարց է, քանի որ հստակ չի առնչվում հանքարդյունաբերության հետ: «2000-ից ավել ջահերի ներկրման մասին է խոսքը և ցանկանում ենք իմանալ, թե այդ ջահերն ինչ նպատակով պետք է օգտագործվեն տվյալ ոլորտում»,-ասաց նա և կրկին շեշտեց, որ պատկան մարմինները չեկան բացատրություն տալու և նույն ժամանակ Դավիթ Անանյանը հայտնել էր, թե հրավեր չի եղել, ինչն էլ, ըստ Բագրատյանի ապացույցների, սուտ է:
Մանրամասները՝ տեսանյութում։