20 Հունվար, 2021 13:48

Պետք է կարողանանք այնպիսի օրենսդրություն բերել, որ մոտիվացնի սահմանամերձ գյուղերի բնակիչներին տեղում մնալ, որ նրանք իմանան՝ գյուղում ապրելն ավելի շահավետ կլինի, քան Երևանում. Սերգեյ Բագրատյան

20 Հունվար, 2021 13:48 Քաղաքական

ԱԺ-ն քննարկեց «Տեղական տուրքերի և վճարների մասին» ՀՀ օրենքում փոփոխություններ և լրացումներ կատելու մասին հարցն» առաջին ընթերցմամբ ընդունելու հարցը: Հիմնական զեկույցով հանդես եկավ ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանը:

Նա նշեց, որ կատարվող փոփոխությունների համար իրենց են դիմել բազմաթիվ համայնքներ, դրա համար էլ գնացել են այդ փոփոխություններին:

«Անհրաժեշտ է սահմանել և հստակեցնել տեղական տուրքերի սահմանումը, մասնավորապես, հեղուկ վառելիքի, սեղմված բնական գազերի վաճառքի թույլտվությունների տրամադրման պարագայում և հստակ սահմանել, որ յուրաքանչյուր լիցքավորման կայանում այդ թույլտվությունները պետք է գործեն: Հիմա էլ են գործում նույն տրամաբանությամբ, բայց որոշ տեղերում առաջնում են տարընթերցումներ այդ պատճառով մենք առաջարկել ենք ավելի հստակ սահմանել, որ տնտեսվարող սուբյեկտի համար այդ թույլտվությունները պետք է գործեն»,- ասաց նա:

Տերտերյանը նշեց, որ յուրաքանչյուր վայրի գործունեության համար սահմանում են տվել հանրային սննդի կազմակերպման համար, առաջարկել են սահմանել 2 նոր վճարներ՝ առաջինը անշարժ գույքի հասցեի տրամադրման համար, և երկրորդը՝ պետական իշխանության մարմինների սպասարկման գրասենյակի գործառույթներից բխող համայնքի կողմից տրամադրված ծառայությունների մատուցման համար: Նա շեշտեց, որ թույլտվությունների ֆիզիկական չափերը չեն փոխվում, և ևս մեկ անգամ ասաց, որ փոփոխություններն առաջարկել են համայնքները:

ԱԺ պատգամավոր Սերգեյ Բագրատյանն էլ իր ելույթում նշեց, որ օրենքի հետ կապված իր մոտեցումն այն է, որ պրոգրեսիվ հարկը պետք է տեղափոխել ՏԻՄ-եր և տուրքեր պրոգրեսիվ հարկման բանաձևերն աստիճանաբար ներդրվեն համայնքներում: «Մենք խնդիր ունենք դեմոգրաֆիական խախտման, սահմանամերձ գյուղերը միգրացիայի հետևանքով անընդհատ լրացնում են մայրաքաղաքի՝ առանց այն էլ ուռճացված համակարգերը: Ի վերջո, մենք պետք է մի օր կարողանանք այնպիսի օրենսդրություն բերենք, որը մոտիվացնի տեղերում մնալն ու աշխատելը: Ասենք՝ Սյունիքի, Վայոց Ձորի մարզի սահմանամերձ գյուղերի բնակվողը գտնի, որ ավելի ճիշտ է ապրել այդ գյուղում, որովհետև շահավետ է, զուտ հաշվարկը ցույց տա, որ այդ գյուղում ապրելն ավելի շահավետ է, քան Երևանում ապրելը»,- ասաց նա:

Ըստ պատգմավորի՝ մոտիվացիոն ռեժիմ պետք է կարողանալ գտնել հատկապես սահմանամերձ գյուղերի համար:

Այս թեմայով