Իտալիայի Սենատը վարչապետ Կոնտեի կառավարությանը մի քանի ձայնի տարբերությամբ վստահության քվե է տվել, բայց ընդդիմությունը ձգտում է հասնել նրա հրաժարականին

Իտալիայի խորհրդարանի վերին պալատը՝ Սենատը, վարչապետ Ջուզեպպե Կոնտեի կառավարությանը վստահության քվե է տվել, հաղորդում է ТАСС-ը:

Կառավարության գործունեությունը շարունակելուն հավանություն է տվել Սենատի 156 անդամ, դեմ է քվեարկել 140 օրենսդիր: Դրանից ավելի վաղ կառավարությանն աջակցության քվե էր տվել նաև խորհրդարանի ստորին պալատը:

Կոնտեն արդեն իսկ հայտարարել է, որ պատրաստ են շարունակել աշխատանքներն առաջնահերթ խնդիրների լուծման ուղղությամբ:

Իտալիայում կառավարական նոր ճգնաժամ էրի հայտ եկել իշխող կոալիցիայից «Կենդանի Իտալիա» կուսակցության դուրս գալու հետևանքով:

Իրավիճակն առավել խնդրահարույց էր Սենատում, որտեղ առանց «Կենդանի Իտալիա» կուսակցության սենատորների 10 ձայն էր պակասում իշխող մեծամասնությանը: Հավանական էր համարվում այն տարբերակը, որ կոալիցիոն ուժերը բաց մնացած տեղերը փորձեն լրացնել խորհրդարանում ներկայացված ուժերից դուրս եկած առանձին խորհրդարանականներին իրենց կողմը գրավելու միջոցով, որոնք պատրաստ կլինեն աջակցել Կոնտեի կառավարությանը:

Կոալիցիան լքած «Կենդանի Իտալիա» կուսակցության ղեկավար և նախկին վարչապետ Ռենցին հայտարարել էր, որ եթե երրորդ ուժեր ներգրավվեն հօգուտ Կոնտեի, ապա իր ղեկավարած քաղաքական ուժը որպես ընդդիմություն կդիրքավորվի ու վստահություն չի հայտնի Կոնտեի կառավարությանը: Հակառակ կողմից Ռենցիին մեղադրում էին կառավարական ճգնաժամ հրահրելու և համավարակի պայմաններում անպատասխանատու վարքագիծ ցուցաբերելու համար:

Այս պայմաններում, սակայն, Կոնտեի հրաժարականի հավանականությունը բացառված չէ: Եթե խորհրդարանի ստորին պալատում նրա կառավարությունը ձայների բացարձակ մեծամասնությամբ է վստահության քվե ստացել, ապա Սենատում՝ ընդամենը տաս ձայնի տարբերությամբ, եւ եթե դեմ քվեարկեին իշխող կոալիցիայից դուրս եկած «Կենդանի Իտալիա» կուսակցության պատգամավորները, ապա ձայների կհավասարվեին: Այդ իսկ պատճառով ընդդիմադիր ուժերը ձգտում են նրա հրաժարականին հասնել՝ հիմնավորելով, որ այսուհետ Սենատ մտնող ցանկացած օրինագծի ընդունում կարող է ձախողվել: