Գերմանիայի ԱԳ նախարարը հայտարարել է, որ կորոնավիրուսի դեմ պատվաստված քաղաքացիները պետք է արտոնություններ ստանան

Կորոնավիրուսի դեմ պատվաստված եւ ձեւավորված իմունիտետով քաղաքացիները պետք է հնարավորություն ստանան վերադառնալ հասարակական կյանքին, հայտարարել է ԳԴՀ ԱԳՆ Հայկո Մաասը Bild am Sonntag թերթում հրապարակված հարցազրույցում:

«Ես համարում եմ, որ պատվաստված մարդիկ պետք է հնարավորություն ստանան կրկին օգտվել իրենց հիմնական իրավունքերից»,-ասել է նա:

Մաասը հավելել է, որ պատվաստված մարդիկ չեն հիվանդանա եւ նրանց կարիք չի լինի տեղավորել ինտենսիվ թերապիայի բաժիններում կամ միացնել ԹԱՕ սարքերին:

«Իսկ եթե ռեստորաններում կամ կինոյում լինեն միայն պատվաստված մարդիկ, ապա նրանք միմյանց վնաս չեն հասցնի»,-նշել է նա:

ԱԳ նախարարը հազվադեպ է կարծիք հայտնում ներքաղաքական թեմատիկայի վերաբերյալ: Նա դարձել է Անգելա Մերկելի կառավարության առաջին անդամը, որն առաջարկել է առավելություններ տրամադրել պատվաստվածներին: Այդ գաղափարը Գերմանիայում լայնորեն չի ընդունվել:

ԳԴՀ-ում կորոնավիրուսի դեմ պատվաստվածների թիվը գերազանցում է 1 միլիոնը (բնակչության ընդհանուր թվի 1 տոկոսից փոքր-ինչ ավելին): Առաջին հերթին պատվաստվել են ծերանոցներում խնամք ստացող քաղաքացիներն ու առողջապահության ոլորտում աշխատող մարդիկ:

Դեկտեմբերի 16-ից Գերմանիայում գործում է կոշտ կարանտինի ռեժիմ: Փակ են գրեթե բոլոր խանութները, բացի մթերայիններից, հաղորդում է ՏԱՍՍ-ը: