Եթե հեռանանք, պետք է հեռանանք թիմով. Լենա Նազարյան. Sputnik Արմենիա
Խորհրդարանական երկրում քաղաքագիտական տեսանկյունից անհեթեթություն է, որ քաղաքական թիմի վարչապետը լինի այլ քաղաքական թիմից։ Այս մասին Sputnik Արմենիայի հետ զրույցում ասել է ՀՀ ԱԺ փոխնախագահ Լենա Նազարյանը։
«Ես ունեմ տպավորություն, որ «Լուսավոր Հայաստան» եւ «Բարգավաճ Հայաստան» խմբակցությունները չեն ուզում արտահերթ ընտրություններ։ Նրանք ավելի քան վստահ են, որ նոր ընտրությունների դեպքում կառավարող ուժ չեն ընտրվի եւ անգամ չեն ստանա այնքան մանդատ, որքան ունեն հիմա։ Նրանք նախորդ ընտրություններում ավելի շատ բոնուսով էին մանդատ ստացել, քան ընտրություններով եւ բնական է, որ այսպիսի բարեբախտություն նրանց հետ այլեւս չի պատահի։ Հաջորդ ընտրություններին նրանք ավելի քիչ ձայներով կհայտնվեն խորհրդարանում կամ չեն հայտնվի»,– նշեց Նազարյանը։
Լենա Նազարյանը բացառեց, որ «Իմ քայլը» խմբակցությունն աջակցի «Լուսավոր Հայաստանի» ղեկավար Էդմոն Մարուքյանին՝ որպես վարչապետի թեկնածու. «Խորհրդարանական երկրում քաղաքագիտական տեսանկյունից անհեթեթություն է, որ քաղաքական թիմի վարչապետը լինի այլ քաղաքական թիմից։ Եթե հեռանանք, պետք է հեռանանք թիմով։ Եթե ցուցակի առաջին համարը հեռանում է, ապա ես ինչո՞ւ պետք է մնամ, խորհրդարանում ի՞նչ պետք է անեմ։ Եթե «Լուսավոր Հայաստան» եւ «Բարգավաճ Հայաստան» խմբակցությունները դեմ են արտահայտվում արտահերթ ընտրություններին, արտախորհրդարանական ուժերը հայտարարում են, որ արդյունքները կեղծվելու են, յուրաքանչյուր քվեատուփի մոտ արյունահեղություն է լինելու, ապա նման պայմաններում ինչպե՞ս կազմակերպենք արտահերթ ընտրություններ, ինչպե՞ս վստահ լինենք, որ կստեղծվի հանգիստ մթնոլորտ եւ մարդիկ ընտրությունների կգնան` լսելով բոլոր թեկնածուներին»։
Պետք է փորձենք մշտական խաղաղություն ունենալ բոլոր հարեւանների հետ, կարծում է ԱԺ փոխնախագահը:
«Հիմա տարբեր փորձագետներ ասում են, որ մի քանի տարի խաղաղ կապրենք, կհզորանանք, կվերազինվենք եւ մեր բաժին հաղթանակը կունենանք։ Կներեք, ես այս մտածողությունը համարում եմ հետադիմական եւ վնասակար։ Ես ուզում եմ, որ մատով ցույց տան, թե ում 18 տարեկան որդու հաշվին են դա ուզում անել»,–ասաց նա։
Նազարյանը նշեց` պետք է փորձենք երկարատեւ խաղաղություն ունենալ մեր բոլոր հարեւանների հետ. տարածաշրջանը վերջապես պետք է մարդկային դեմք ունենա։
Հարցին, թե Նազարյանը հակադարձո՞ւմ է այն պնդումներին, որ այլեւս ոչ մի պատերազմով հնարավոր չէ հետ բերել կորցրած տարածքները` Նազարյանը պատասխանեց, որ ինքը պատերազմով չի ուզում դա անել։
«Ես ուզում եմ քաղաքական գործընթացների միջոցով դա անել»,–հավելեց նա։
Նազարյանն անդրադարձավ նաեւ այն կարծիքին, թե պարտված երկրի ղեկավարը բանակցել չի կարող` ասելով`գուցե հենց պարտված ղեկավարն այժմ առավել լավ է պատկերացնում մեր դրությունը։
«Փաշինյանի ոտքերն ամուր կերպով գետնին են, ոչ թե երկնքում` երազանքների մեջ։ Նա շատ լավ պատկերացնում է, թե ինչ հնարավորություններ ունենք մենք հիմա, ինչ հնարավորություններ կարող ենք օգտագործել մեզ համար շահեկան դիրքերում հայտնվելու համար»,–ասաց Նազարյանը։