Նիկոլին հեռացնելու 4 ճանապարհ ունենք. Իշխան Սաղաթելյան
Մենք ունենք Նիկոլ Փաշինյանին հեռացնելու 4 ճանապարհ։ Այս մասին հունվարի 15-ին Գյումրիում հայտարարել է ՀՅԴ ԳՄ անդամ Իշխան Սաղաթելյանը:
«Առաջինը, եթե նա հասկանար, ինքնասիրություն, պատասխանատվություն ունենար, մտածեր մեր պետության մասին, պետք է հրաժարական տար։
Երկրորդը, եթե Ազգային ժողովի «Իմ քայլը» խմբակցութունը հսկանա կրկին, որ պաշտպանելով Նիկոլ Փաշինյանին՝ մաս է կազմում այս դավաճանությանը, հրավիրի Ազգային ժողովի արտահերթ նիստ եւ պաշտոնանկություն անի։
Երրորդը, գիտեք՝ մենք արդեն դատախազությանը տվել ենք հաղորդում եւ պահանջում ենք, որպեսզի պետական դավաճանության հոդվածով մեղադրանք առաջադրվի եւ ձերբակալվի Նիկոլ Փաշինյանը։
Եւ չորրորդ տարբերակը կա, եթե կառավարության 2/3-ը՝ 10 նախարարա հանդես գա նախաձեռնությամբ»,- նշեց Սաղաթելյանը եւ հավելեց, որ այս չորս ուղղություններով իրենք պետք է իրականացնե հետեւողական աշխատանք։
«Մեզ շատերը ասում են՝ գնացեք, գրավեք, սատկացրեք, հա՛մ ասում եք՝ դավաճան է, հա՛մ շարունակում է մնալ իշխանության, հարգելի քաղաքացիներ, սա այդ ճանապարհը չի։ Մենք պետք է համահայաստանյան բուռն, հետեւողական պահանջով ստիպենք, որպեսզի այս մարդը հեռանա, տարբերակը սա է։ Մենք անցնող երկու ամսվա ընթացքում գրեթե փողոցից տուն չենք գնացել։ Հիմա շատ մարդիկ տանը նստած մեզ կոչ են անում ավելի վճռական լինել։ Մի տարբերակ կա. Ժողովուրդը պետք է իջնի փողոց, կազմակերպի եւ հեռացնի այս իշխանությանը, այլ ճանապարհ չկա։ Իսկ որ Նիկոլը հեռանալու է, դա փաստ է, դրանից չի կարողանալու խուսափել, խնդիրը ժամկետների մեջ է։ Մենք ասում ենք, որ նրա ամեն օր ավել մնալով պետությունը ունենում է կորուստ, հոկտեմբերի 9-ից հետո տեսել ենք՝ այս պետությունը անտեր է, սա է խնդիրը, որ որքան հնարավոր է շուտ հեռացնենք։ Դա պետք է անենք միասին, միայն մայրաքաղաքում պետք է չլինի, ձեր հիմնական խնդիրը. Գյումրու ընտրատարածքից ունենք մի քանի ընտրված պատգամավորներ, որոնցից մեկը արժանապատվություն դրսեւորեց եւ դուրս եկավ, մնացածն էլ ձեր ճնշումների տակ պետք է գնան այդ քայլին։ Սա է ճանապարհը»,- ասաց Սաղաթելյանը։