Իսրայելը մշակում է Իրանի միջուկային օբյեկտներին հարվածներ հասցնելու ծրագրեր
Իսրայելի պաշտպանության ուժերը մշակում են Իրանի միջուկային օբյեկտներին հարվածներ հասցնելու ծրագրեր: Այս մասին հայտնել է իսրայելական Hayom պարբերականը:
Լրատվամիջոցը, վկայակոչելով ռազմական գերատեսչության իր աղբյուրները, պնդում է, որ Իսրայելի զինված ուժերի գլխավոր շտաբի պետ, գեներալ-լեյտենանտ Ավիվ Կոհավին խնդրել է «Թեհրանի միջուկային ծրագիրը խափանելու երեք այլընտրանքային առաջարկ ներկայացնել»: Առանց մանրամասնելու այս առաջարկների էությունը, թերթը նշում է, որ տարբերակներից մեկը Իսլամական Հանրապետության դեմ ռազմական գործողությունն է:
Հիշեցնենք՝ Իրանն անցած շաբաթ վերսկսեց ուրանի հարստացումը մինչև 20 տոկոս, ինչը գերազանցում է աշխարհի տերությունների հետ Իրանի 2015 թ. կնքած պայմանագրով նախատեսված սահմանաչափը, և Times of Israel-ի խոսքով՝ ներկայացնում է «միջանկյալ տեխնիկական ցատկ դեպի 90 տոկոս հարստացման մակարդակ, որն անհրաժեշտ է միջուկային զենք արտադրելու համար»:
Նշենք՝ իսրայելական պարբերականում այս մասին լուրերն սկսեցին շրջանառվել այն բանից մի քանի օր հետո, երբ վարչապետ Բենյամին Նեթանյահուի գլխավորած «Լիկուդ» կուսակցության խոսնակ Ցախի Հանեգբին սպառնաց, որ Իսրայելը կարող է հարձակվել Իրանի միջուկային ենթակառուցվածքի վրա, եթե ԱՄՆ-ն նորընտիր նախագահ Ջո Բայդենի օրոք վերադառնա միջուկային գործարքին, որից 2018-ի մայիսին միակողմանի կերպով դուրս եկավ Սպիտակ տունը՝ գործող նախագահ Դոնալդ Թրամփի ղեկավարությամբ:
«Եթե ԱՄՆ կառավարությունը միանա միջուկային գործարքին, և այս պահին կարծես թե հենց սա է հայտարարված քաղաքականությունը, գործնական արդյունքը կլինի այն, որ Իսրայելը կրկին մենակ կմնա Իրանի դեմ, որով Թեհրանին կանաչ լույս կտրվի ամբողջ աշխարհից, ներառյալ Միացյալ Նահանգներից, շարունակելու իր միջուկային զենքի ծրագիրը», - ասել է Հանեգբին Kan news-ին տված հարցազրույցում:
«Իհարկե, մենք դա թույլ չենք տա: Մենք արդեն երկու անգամ արել ենք այն, ինչ պետք է արվեր՝ 1981-ին Իրաքի և 2007-ին՝ Սիրիայի միջուկային ծրագրերի դեմ», - հավելել է նա՝ նկատի ունենալով իսրայելական օդային հարվածները երկու արաբական երկրներում միջուկային ռեակտորների դեմ:
Հիշեցնենք՝ անցյալ ամիս Ջո Բայդենը քննադատել էր ԱՄՆ ներկայիս վարչակազմի իրանական քաղաքականությունը՝ Դոնալդ Թրամփի գլխավորությամբ, ներառյալ հեռացող նախագահի որոշումը՝ Իրանի հետ միջուկային գործարքից միակողմանիորեն դուրս գալու վերաբերյալ:
Իր խոսքում Բայդենը հաստատել էր ԱՄՆ-ին գործողության համատեղ համապարփակ ծրագրին վերադարձնելու իր ցանկությունը, պայմանով, որ Իրանն ինքը վերսկսի 2015 թվականի համաձայնագրի բոլոր կետերի ամբողջությամբ կատարումը:
Միևնույն ժամանակ, Բայդենը շեշտել էր, որ մտադիր չէ թույլ տալ Իրանին ձեռք բերել ռազմական միջուկային ներուժ: