Ahval. Պատրա՞ստ է արդյոք Իսրայելը Թուրքիայի հետ հարաբերությունների կարգավորմանը

Իսրայելցի պաշտոնյաները ոչ մի կերպ չեն պատասխանել Թուրքիայի հետ հարաբերությունների կարգավորման հեռանկարներին իր մտադրությունների լրջության մասին Անկարայի ակնարկներից հետո մի քանի շաբաթ անց, գրում է Ahval-ը:

Ավելի վաղ Թուրքիայի նախագահ Թայիփ Էրդողանը հայտարարել է, որ կցանկանար կարգավորել երկու երկրների հարաբերությունները, ինչը Իսրայելի արտաքին գործերի նախարար Գաբի Աշքենազիին ստիպել է նախարարների կաբինետի նիստ հրավիրել:

«Սակայն գնահատականն ինքնին բավարար ազդանշան չի տալիս, որ Իսրայելը պատրաստ է հետագա քայլեր ձեռնարկել կարգավորման համար»,-ասվում է հոդվածում:

Իսրայելի ԱԳՆ նախկին գործադիր տնօրեն եւ պաշտոնաթող դեսպան Ալոն Լիելը վստահեցրել է, որ Իսրայելի ներկայիս կառավարությունը հետաքրքրված չէ Թուրքիայի հետ հարաբերությւոնների կարգավորմամբ:

«Ղեկավարությունների մակարդակով նվազագույն վստահություն չկա»,-գրել է Լիելը Ahval-ին ուղղված էլեկտրոնային նամակում:

ԱՄԷ-ն եւս մեկ կարեւոր խաղացող է, որը կանգնած է թուրք-իսրայելական ցանկացած հաշտեցման հետեւում: Այն բանից հետո, երբ Էմիրատները հայտարարել են ԱՄՆ աջակցությամբ Իսրայելի հետ դիվանագիտական հարաբերությունները կարգավորելու մասին, Թուրքիան մերժել է գործարքն ու հետ կանչել Աբու Դաբիից իր դեսպանին: Էլ ավելի ձգելով հակառակորդների ցանցը՝ Եգիպտոսը ԱՄԷ-ին հրավիրել է մասնակցել Արեւելամիջերկրածովյան գազային ֆորումին, որի անդամներն են նաեւ Իսրայելը, Հունաստանն ու Կիպրոսը: Իսրայելական ԶԼՄ-ները հայտնել են նաեւ, որ Թուրքիայում Իսրայելի վերջին դեսպան Էյթան Նաեն կգլխավորի Աբու Դաբիում Իսրայելի ժամանակավոր դիվանագիտական պաշտոնը:

Ի վերջո, ԱՄՆ նախագահի պաշտոնում Ջո Բայդենի ընտրությունը Անկարային անհետաձգելի անհրաժեշտություն է ավելացրել՝ խուսափելու աճող մեկուսացումից: Բայդենը, ով իր քարոզարշավի ժամանակ քննադատել է Թուրքիային, Իսրայելի եւ «Աբրահամի համաձայնությունների» աջակիցն է:

Չնայած նրան, որ Իսրայելն ու Թուրքիան տարբեր հայացքներ ունեն շատ հարցերի շուրջ, նրանք աջակցում են Ադրբեջանին Լեռնային Ղարաբաղի պատերազմում՝ նշվում է հոդվածում:

«Ադրբեջանի նախագահ Իլհամ Ալիեւը նույնիսկ հանդես է եկել որպես իր դաշնակիցների միջեւ միջնորդ»,-հավելում է հեղինակը: