Մեր հազարավոր երիտասարդների արյան վրա կառուցված ապաշրջափակում ինձ պետք չի. Միքայել Մելքումյան

Մոսկովյան հանդիպումները ցույց տվեցին, որ պարտված ղեկավարը չի կարող լուրջ որեւէ հարցի շուրջ բանակցություններ վարել։ Այս մասին այսօր՝ հունվարի 12-ին, լրագրողների հետ զրույցում ասաց ԲՀԿ պատգամավոր Միքայել Մելքումյանը՝ անդրադառնալով Մոսկվայում Պուտինի, Փաշինյանի եւ Ալիեւի հանդիպմանը։

«Նույնիսկ եթե ինչ-որ նկատառումներ կային, այլեւս մենք տեսանք, որ որեւէ կողմի ղեկավարի կողմից լուրջ չի ընդունվում այդ ամբողջ բանակցությունները եւ Հայաստանին պարտադրվում է այն, ինչ նախօրոք մտածվել էր, այսինքն՝ պարտվողական քաղաքականության ծրագիրը շարունակվում է»,- նշեց նա։

Մելքումյանի խոսքով՝ պետք է հրատապ կատարվի իշխանափոխություն. «Կգան մարդիկ, ձեւավորվի նոր իշխանություն, որն արժանապատիվ կբանակցի, նոր որակ կհաղորդի հայ-ռուսական հարաբերություններին, որը ամենավճռականն է։ Ես հեռու եմ այն մտքից, որ երեկ եւ այսօր մեր հազարավոր հայ երիտասարդների արյան վրա կառուցված ապաշրջափակում ինձ պետք չի։ Այսօր մենք չգիտենք՝ մեր երկրի անվտանգությունն ով է ապահովում, անվտանգային համակարգն ինչ ձեւի է, արդյոք եթե երկրորդ ալիքը գա, մեր դիմադրողականությունը ինչպիսին է լինելու»։

Անդրադառնալով ապաշրջափակմանը՝ պատգամավորը նշեց, որ իր համար անհասկանալի է՝ ինչ ճանապարհների մասին է խոսքը. «Նախիջեւան Մեղրիով դեպի Զանգելան 42 կիլոմետր է։ Ոնց պետք է անցնի, եթե այդտեղ երկաթուղի չկա, ես չեմ հասկանում՝ ուր է գնում, մնչեւ Հորադիզ կայարան երկաթուղի գոյություն չունի։ Եթե խոսք է գնում Նախիջեւանից գալիս են Երեւան, անհասկանալի է՝ գալիս են՝ ի՞նչ անեն։ Թուրքիան մի քանի միլիարդ դոլար դնելու եւ կառուցել է Թուրքիայից Կարսից դեպի Նախիջեւան երկաթուղի։ Եթե Ադրբեջանը պետք է այդ երկաթուղին կառուցի կամ Մեղրիով մտնի Նախիջեւան, դա էլ է խնդիր։ Եթե մենք այստեղ ինչ-որ բանից պետք է օգտվենք, ինձ համար անհասկանալի է, թե ոնց պիտի օգտվենք»։

Անդրադառնալով հայ-ռուսական հարաբերություններին՝ Միքայել Մելքումյանը նշեց. «Քո ստրատեգիական գործընկերոջ կարողանաս այնպիսի հարաբերություններ կառուցել, որ քեզ հարգեն, քեզ հետ հաշվի նստեն, իսկ դա հնարավոր է։ Դա անհնար է Նիկոլ Փաշինյանի առկայության պայմաններում։ Պետք է այդ փոփոխությունն այնպայման կատարվի, կձեւավորվի նոր որակի իշխանություն, կձեւավորվեն անհետաձգելի Ռուսաստանի հետ հարաբերություններ, գուցե պետք կլինի վերանայել գործող պայմանագիրը, որոշ դրույթներ ավելացնել, անպայման պետք է անդրադառնալ նոր ռազմական բազայի տեղակայումը ՀՀ-ում։ Այսինքն՝ մեր Ռուսաստանի համար ունենք ռազմավարական նշանակություն, ինքն էլ է շահագրգռված, որ Հայաստանը լինի կայուն վիճակում։ Ռուսաստանին պետք չի թույլ Հայաստան»։