Բանակցությունով հայրենիք չեն վերադարձնում, դատապարտված ենք մոտ ապագայում նորից արյուն տալու, ես տալու եմ. Սրապիոնյան
Մենք անհիմն ոգեւորեցինք մեր 18-20 տարեկաններին՝ «հաղթելու ենք»-ի բարբաջանքով եւ ուղարկեցինք պարտության, ու այսօր մի ամբողջ ժողովուրդ հայտնվել է պարտվածի հոգեբանության մեջ: Այս մասին, այսօր՝ հունվարի 12-ին, Մշակույթի գործիչների «Ձայն հայրենյաց» նախաձեռնության մեծ հավաքի ժամանակ նշեց գրականագետ Սերժ Սրապիոնյանը:
«Երեկ լրացավ իմ եղբոր անհետ կորած զինվորի 20-ամյակը, որից լուր չունենք: Մեր ականջները խցկեցին անլվա ոչխարի բրդով, թե էս մարդը գնում է այնտեղ լուծելու գերիների եւ անհայտ կորածների հարցը: Ինքը զարմանալի ցինիզմով ուղղակի հայտարարեց, որ մեզ չհաջողվեց լուծել այդ հարցը: Բայց նա լուծեց գերեվարված հայրենիքի հարցը: Նա տվեց իր հայրենիքի մի զգալի մասը իր կեղտոտ ստորագրությամբ, որի դեմ մենք դեռ երկար պայքարելու ենք: Մեր խնդիրը լինելու է մեր շարքերում գոյություն ունեցող այն մտավորականի դեմ պայքարը, որը զարմանալի չարախնդությամբ, հոգուն մի թիզ յուղ նստած բավականությամբ հայտարարում է՝ կերա՞ք, Նիկոլի հաջողությունները կատաղեցնում են ձեզ: Նիկոլի հաջողությունը ո՞րն է, երկիրը սահմանագծել թուրքի ցանկությա՞մբ, ամբողջ հարավը նվիրել թուրքի՞ն, բանակ պահելու կարողությունից զրկվե՞լ: Երկրաշարժը մեզ այսքան չկոտրեց, ինչքան կոտրեց այս պարտությունը: Մեր խնդիրը այս մտավորականին դաս տալն է եւ այն մտավորականին, որն ասում է՝ համախմբվեք վարչապետի կողքին: Նրանք, որոնք չունեն հիշողություն, համախմբվում են վարչապետի կողքին»,-ասաց Սրապիոնյանը:
«Բանակցություններով հայրենիք չեն վերադարձնում, մենք դատապարտված ենք ամենամոտ ապագայում նորից արյուն տալու, որքան էլ դա դաժան հնչի: Ես տալու եմ այդ արյունը: Մենք պետք է գնանք կտրուկ քայլերի: Մենք պետք է կարողանանք վերականգնել Սփյուռքի հետ մեր հարաբերությունները: Մեզ մնում է միայն միասնականությունը, իսկ այստեղ մի խնդիր ունենք՝ ո՞ւմ հետ: Այս վարչակազմի հետ բացառվում է, նախկինների հետ նույնպես: Նախորդին վերադառնալ չկա, կա ստեղծելու նոր Հայաստան՝ մեր ու ձեր պատկերացմամբ»,-ընդգծեց նա: