Միջազգային կառույցներից խռովելը բերելու է նրան, որ մնալու ենք Ալիևի հույսին. Էդմոն Մարուքյան

Ես գիտեմ, որ գերու կարգավիճակով ադրբեջանական բանտում ամեն մի օր մնալը խնդիր է մեր ազգի համար. ես եղել եմ Ադրբեջանում գերեվարված անձի փաստաբան, այդ գործը մինչեւ հիմա ՄԻԵԴ-ում է քննվում է: Այս մասին, այսօր՝ հունվարի 12-ին, ԱԺ-ում լրագրողների հետ զրույցում նշեց ԼՀԿ խմբակցության ղեկավար Էդմոն Մարուքյանը:

«Դա Արթուր Բադալյանի գործն է, ով Հաղարձին գյուղից գնացել էր անտառ ու գերեվարվել: Այսքանից հետո գնալ Մոսկվա ստորագրել մի թուղթ, որտեղ չկա գերիների վերադարձի մասին ոչ մի բառ… ի՞նչ առեւտուր, ի՞նչ փող, ի՞նչ գնացք: Ես կարծում եմ, որ գերիների հարցը Մոսկվայում քննարկվել է, որովհետեւ բաց հայտարարվեց, որ չհաջողվեց հասնել համաձայնության: Չի հաջողվել, չստորագրեիք այդ թուղթը»,-ասաց նա:

Մարուքյանն անդրադարձավ Ալիեւի հայտարարությանը, որ Արցախի հակամարտության մասին արդեն պետք է խոսել անցյալով, որովհետեւ այն լուծվել է. «Նույնն ասում է Թուրքիան: Իրենք համարում են այս հաղթանակը որպես խնդրի կարգավորման ավարտ: Հետեւաբար խոսում են առեւտրի մասին: Մենք տեսնում ենք, որ իրենց այդ լուծելու հետեւանքով ունենք ռազմագերիներ, դիակների փոխանակման խնդիրներ: Այս հարցերը պետք է լուծումներ ստանան:

Ժնեւյան կոնվենցիան ստորագրած Ադրբեջանը միջազգային հանցագործություն է կատարում՝ ռազմագերիներին չվերադարձնելով: Նաեւ ռազմագերիներին փորձում է անցկացնել որպես հանցագործներ: Հիմա մեր դիվանագետները, միջազգային կառույցներում մեր ներկայացուցիչները պետք է քուն ու դադար չունենան եւ միջազգային ճնշումը պետք է ուժեղանա Բաքվի վրա: Միջազգային հանրությունը Ադրբեջանին պետք է ասի՝ դու ասում ես, որ հաղթել ես պատերազմ, որ Արցախի խնդիրը կարգավորել ես: 21-րդ դարում 100-ից ավելի ռազմագերի պահելը ո՞րն է: Ով է ասել, որ դու նման իրավունք ունես:

Ես դիմել եմ ԵԽ Խոշտանգումների կանխարգելման կոմիտեին, որ յաց կատարեին Ադրբեջան ու տեսնեինմարդկանց վիճակը, եւ դրա արդյունքում կարձանագրվեր, թե քանի հոգի են: Դրանից հետո Ադրբեջանն արագ կարանտին հայտարարեց ու փակեց սահմանները:»,-ասաց Մարուքյանը՝ հավելելով, որ խռովել միջազգային կառույցներից՝ ասելով, որ բավարարված չենք ձեր աշխատանքից, դա բերելու է նրան, որ մնալու ենք Ալիևի հույսին:

«Կոնսենսուս մինուս մեկ»-ը ուժի մեջ է. Վաղը ԱԺ հայտարարության որոշման նախագիծ է քննարկվելու. Մարուքյան