Սաուդյան Արաբիայի թագաժառանգի նոր նախագիծը՝ քաղաք առանց մեքենաների, ճանապարհների և ածխածնի արտանետումների

Սաուդյան Արաբիայի թագաժառանգ արքայազն Մուհամմեդ բեն Սալմանը հայտարարել է նոր նախագծի մասին` քաղաք առանց մեքենաների, ճանապարհների եւ ածխածնի արտանետումների, գրում է Bloomberg-ը:

170 կիլոմետրանոց նախագիծը, որը կոչվում է The Line, 500 միլիարդ դոլար արժողությամբ Neom նախագծի մի մասն է կազմում: Նախատեսվում է շինարարությունը սկսել այս տարվա առաջին եռամսյակում:

Մամուլի հաղորդագրության մեջ The Line-ը նկարագրում է որպես հետիոտնային «ապագա հիպերկապակցված համայնքների գոտի, առանց մեքենաների եւ ճանապարհների եւ բնության շուրջ կառուցված»: Դրանում ասվում է, որ մինչ 2030 թվականը քաղաքը կունենա 1 միլիոն բնակիչ եւ 380 000 աշխատատեղ: Ենթակառուցվածքները կարժենան 100-200 մլրդ դոլար:

Neom-ը հում նավթի աշխարհի խոշորագույն արտահանող տնտեսության դիվերսիֆիկացման արքայազն Մուհամմեդի ծրագրի մի կարեւոր մասն է: 2017-ին հայտարարված նախագիծը ընդգրկում է ավելի քան 10 000 քառակուսի մղոն տարածք՝ երկրի հյուսիսարեւմտյան հեռավոր շրջանում: Կայքում այն նկարագրվում է որպես «հավակնոտ եւ համարձակ երազանք», որը կդառնա նոր տեխնոլոգիաների եւ բիզնեսի կենտրոն: