Parler-ը հեռացրել է Թրամփի փաստաբանի՝ փոխնախագահ Փենսին գնդակահարելու մասին հաղորդագրությունը
Parler հաղորդագրությունների փոխանակման ծրագրի գործադիր տնօրեն Ջոն Մատցեն հայտնել է, որ հեռացվել են ԱՄՆ նախագահ Դոնալդ Թրամփի փաստաբան Լինա Վուդի որոշ հրապարակումներ, այդ թվում՝ փոխնախագահ Մայք Փենսին գնդակահարելու վերաբերյալ hրապարակումը, հաղորդում է Mediaite պորտալը:
«Մի քանի հրապարակումներ, որոնք խախտել են մեր կանոնները, հեռացվել են»,- նշել է Մատցեն:
Պորտալը նաև հրապարակել է հեռացված հրապարակումների էկրանակադրերը։
«Պատրաստվեք գնդակահարությունների։ Փենսն առաջինն է»,- ասված է Վուդի հրապարակումներից մեկում։
Mediaite-ի փոխանցմամբ՝ Վուդը տեղյակ չի եղել, որ հավելվածը հեռացրել է իր հրապարակումները։
«Ես տեղյակ չեմ Parler-ի գործողության մասին, որն ուղղված է իմ հրապարակումները հեռացնելուն։ Եթե դա տեղի է ունեցել, ինձ այդ մասին չեն տեղեկացրել»,- նշել է Վուդը:
Ավելի վաղ հաղորդվել էր, որ Apple-ն իր առցանց խանութից հեռացրել է Parler հաղորդագրությունների փոխանակման ծրագիրը, որն օգտագործվում է ԱՄՆ նախագահ Դոնալդ Թրամփի կողմնակիցների կողմից:
Apple-ը հայտարարել է, որ Parler-ի օգտատերերի հաղորդագրությունները՝ կապված ԱՄՆ Կապիտոլիումի անկարգությունների հետ, պարունակում են բռնության կոչեր, ինչը խախտում է ընկերության կանոնները:
«Մենք միշտ աջակցել ենք տարբեր տեսակետների ... բայց մեր հարթակում բռնության սպառնալիքների և ապօրինի գործողությունների տեղ չկա: Parler–ը համարժեք միջոցներ չի ձեռնարկել այդ անվտանգության սպառնալիքների տարածումը կանխելու համար: Մենք արգելափակել ենք Parler-ը App Store-ում, մինչև նրանք լուծեն այդ խնդիրները»,- ասվում է Apple-ի հայտարարության մեջ:
Ավելի ուշ հավելվածի արգելափակման մասին հայտարարել է նաև Amazon ընկերությունը: Google Play-ից Parler-ը նույնպես հեռացվել է։