Ոսկու գինն ընկնում է դոլարի ամրապնդման ֆոնին. Գազի գները հասել են առավելագույնին. Պղինձը գրեթե 2 տոկոսով էժանանում է Չինաստանում COVID-ի հետ կապված իրավիճակի վատթարացման ֆոնին

Երկուշաբթի առավոտյան ոսկու գինն ընկնում է. դոլարի գնի բարձրացումն ԱՄՆ պետական ​​պարտատոմսերի եկամտաբերության աճի ֆոնին ճնշում է գործադրում թանկարժեք մետաղների գնանշումների վրա, վկայում են աճուրդների տվյալները, փոխանցում է Prime-ը:

Նյու Յորքի Comex ֆոնդային բորսայում ոսկու փետրվարյան ֆյուչերսների գինը նվազել է 0.16 տոկոսով կամ 2.9 դոլարով` մեկ տրոյական ունցիայի դիմաց կազմելով 1832.5 դոլար: Արծաթի մարտյան ֆյուչերսների գինն աճել է 0.33 տոկոսով եւ կազմել 26718 դոլար մեկ ունցիայի դիմաց:

ԱՄՆ 10-ամյա պարտատոմսերի եկամտաբերությունն աճել է 1.2 տոկոսային կետով` մինչեւ 1.119 տոկոս: Այս ֆոնին դոլարի ինդեքսն (դոլարի փոխարժեքը Միացյալ Նահանգների հիմնական առեւտրային գործընկեր վեց երկրների արժույթների զամբյուղի նկատմամբ) ամրապնդվել է 0.39 տոկոսով` մինչեւ 90.45 կետ:

Գազի գները հասել են առավելագույնին

Ցուրտ ձմեռը հանգեցրել է ասիական եւ եվրոպական շուկաներում բնական գազի կտրուկ թանկացման, ինչի հետեւանքով Եվրոպայում ռեկորդային արագությամբ նվազում են ստորգետնյա պահուստարանների պաշարները, հայտնում է «Կոմերսանտը»:

Եվրոպական ամենախոշոր հաբում, նիդեռլանդական TTF-ում գները հասել են 1000 խոր.մետրի դիմաց 252 դոլարի, որը 2019 թվականի հունվարի 25-ից ի վեր առավելագույնն է: Իսկ Իսպանիայում երկիրը ծածկած ձյան տեղումների ֆոնին PVB հաբում վառելիքի արժեքը բարձրացել է մինչեւ 645,84 դոլար:

Ասիացի գնորդները ստիպված են ավելի շատ վճարել: Հունվարի 7-ին Platts JKM ինդեքսը, որը ցույց է տալիս Հյուսիարեւելյան Ասիա մատակարարումների միջին արժեքը, հասել է խոր.մետրի դիմաց ռեկորդային 812 դոլարի: Գնաճի դինամիկան ավելի կտրուկ է, քան շուկայում բարձրացումը 2011 թվականին «Ֆուկուսիմա» ճապոնական ատոմային կայանում վթարից հետո:

Հիմնական խնդիրն է դարձել հեղուկ բնական գազի (ՀԲԳ) պակասը, որի արտադրությունը կրճատվել է Ավստրալիայում, Կատարում եւ Մալայզիայում: ԱՄՆ-ից մատակարարումները չեն կարող բավարարել պահանջարկը, քանի որ գազատարները չեն հասցնում մոտենալ վաճառքի վայրերին:

Քանի որ ներկայումս ամբողջ ազատ ՀԲԳ-ն գնում է Ասիա, Եվրոպայում հունվարին ստորգետնյա պահուստարաններից 30 տոկոսով ավելի են գազ վերցնում, քան միջինում վերջին 5 տարում: Բայց առայժմ պաշարները այս եղանակի համար սովորական մակարդակում են:

«Գազպրոմը» չի շտապում մեծացնել տարածաշրջան մատակարարումները՝ փորձելով լրացուցիչ վաստակել բարձր գների հաշվին: Ընդ որում՝ ընկերությունն առաջին հերթին ջանում է թույլ չտալ լրացուցիչ ծավալներ ուկրաինական ուղղությամբ՝ օգտագործելով այլ երթուղիներ: Եթե Ուկրաինայով մատակարարումները դեկտեմբերին օրական 182,8 մլն խոր.մետր մակարդակում էին, ապա հունվարին՝ շուրջ 100 մլն:

Պղինձը գրեթե 2 տոկոսով էժանանում է Չինաստանում COVID-ի հետ կապված իրավիճակի վատթարացման ֆոնին

Երկուշաբթի առավոտյան պղնձի արժեքը շուրջ 2 տոկոսով նվազում է Չինաստանում կորոնավիրուսի նոր բռնկման ֆոնին, որն այս արդյունաբերական մետաղի ամենախոշոր սպառողն է, վկայում են սակարկությունների տվյալները, փոխանցում է «Փրայմը»:

Comex բորսայում պղնձի մարտյան ֆյուչերսների արժեքը նվազել է 1,97 տոկոսով՝ հասնելով ֆունտի դիմաց (մոտ 0,45 կգ) մինչեւ 3,6187 դոլարի:

Լոնդոնի մետաղների բորսայում (LME) ուրբաթ կայացած սակարկությունների արդյունքներով՝ մեկ տոննա պղնձի արժեքը, եռամսյա մատակարարումներով, նվազել է 0,59 տոկոսով՝ մինչեւ 8131 դոլար, ալյումինի տոննայի արժեքը՝ 0,74 տոկոսով, մինչեւ 2021,5 դոլար, ցինկի՝ 2,58 տոկոսով, մինչեւ 2813,5 դոլար:

Կորոնավիրուսի շուրջ իրավիճակը շարունակում է զգալիորեն ազդել շուկաների տրամադրության վրա: Չնայած պատվաստանյութերի օգտագործման զանգվածային ծավալմանը, ամբողջ աշխարհում շարունակվում են հայտնաբերվել վարակման նոր դեպքեր: Այսպես՝ Չինաստանի Հեբեյ նահանգի երկու քաղաքների իշխանությունները կորոնավիրուսի նոր բռնկման պատճառով անցկացրել են ամբողջ բնակչության COVID-19-ի թեստավորում եւ մարդկանց խնդրել մեկ շաբաթ տանը մնալ:

Դրանից բացի, Ճապոնիայում երկու պրեֆեկտուրաներ կորոնավիրուսի պատճառով հայտարարել են արտակարգ դրության ռեժիմ: Երկրում նաեւ հայտարարել են վիրուսի նոր մուտացիայի հայտնաբերման մասին, որը տարբերվում է Մեծ Բրիտանիայում եւ ՀԱՀ-ում տարածվողներից: