Զորամասի հրամանատարն ասում է` ես հրաման եմ տվել փախչել, ո՞ւր փախնեն, եթե տեղանքին ծանոթ չեն․ անհետ կորածի հարազատ
Իմ տղան հաղորդագրություն է ուղարկել, որ շրջափակման մեջ է գտնվում՝ այսինչ տեղում։ Մտել եմ Կապանի շտաբ, գեներալ Անդրանիկ Մակարյանին ասել եմ, որ իմ տղան այս տեղում է, կոնկրետ տեղը նշել եմ, նույնը ասել եմ հրամանատար Արսեն Աբգարյանին, ասել եմ եկեք մի հնար գտնենք հանենք, իմ տղու հետ էլի մարդիկ կլինեին, բացարձակ ոչինչ չարեցին։ Այս մասին այսօր՝ հունվարի 8-ին, Էջմիածնի զորամասի դիմաց նստացույցի ժամանակ ասաց անհետ կորած զինծառայողի ծնողը:
«Ինձ ասացին՝ հոպար ջան, մարդ կա` մի ամիս շրջափակման մեջ է լինում, հետո դուրս է գալիս, մի քանի օր հետո կգա, մինչեւ այսօր անհայտ է։ Ե՞րբ պիտի գա, ինչի մասին է խոսքը, ստիպված ենք եկել այստեղ հավաքվել»,– ասաց նա։
Ըստ նրա՝ համացանցում տարածված տեսանյութերից մեկում իր տղային նմանեցնողներ եղել են, բայց ինքը չի նմանեցնում, համոզված չէ, որ իր տղան է։
«Ստի վրա հիմնված երկիր է, թող էդ ղեկավարներից մեկը գա, ասի՝ այս բանը ճիշտ եմ ասել, ինչքան հանդիպում եղել է, ասել եմ՝ գոնե մի բան ասեք, ասեմ՝ ճիշտ ես ասում, ստի վրա նստած են։ Զորամասի հրամանատարն ասում է, որ ես հրաման եմ տվել փախչել, ասում եմ՝ դու զորամասի աշխատող ես, ո՞ւր փախնեն, եթե տեղանքին ծանոթ չեն: Աբգարյանն ասում ա, թե նահանջի հրաման է տվել, լավ, եթե նահանջ, ապա ինքը պետք է զորքի հետ նահանջեր, ինքը փախել է, եկել, էդ դեպքում իր զորքն ո՞ւր է»,- նկատեց նա։
Անհետ կորածի հարազատն ասաց, որ այս օրերին իրենց պարբերաբար ստել են, թե ուր որ է նորություն կլինի, բայց անօգուտ։