Հայ- ամերիկյան հարաբերություններում հետևողական աշխատանք ընդհանրապես չի տարվել, դա կարողության բացակայության հետևանք է․ Սուրեն Սարգսյան
ՀՀ արտաքին քաղաքականության մեջ վերջին երկուսուկես տարվա ընթացքում որևէ լուրջ հաջողություն արձանագրել չենք կարող, այսինքն չկա մի լուրջ ու կարևոր ձեռքբերում, որ տեղի է ունեցել վերջին երկուսուկես տարվա ընթացքում։ Այս մասին Tert.am-ի հետ զրույցում ասաց քաղաքագետ Սուրեն Սարգսյանը։
Նրա խոսքով, եթե հարց ուղղենք, թե ինչ լուրջ քաղաքական ձեռքբերում է ունեցել ՀՀ-ն վերջին երկուսուկես տարվա ընթացքում, ապա կգանք այն եզրակացության, որ որևէ լուրջ ձեռքբերման մասին խոսք անգամ լինել չի կարող։
«Նույն պատկերն է նաև հայ-ամերիկյան հարաբերություններում, որտեղ որևէ նշանակալի ձեռքբերում չի եղել, բարձր մակարդակի հանդիպումներ Թրամփի վարչակազմի հետ այդպես էլ տեղի չունեցան, միայն վարչակազմի վերջին օրերին ՀՀ արտգործնախարարը հանդիպում ունեցավ պետքարտուղարի հետ, այն էլ բացառապես արցախյան պատերազմի ամենածանր օրերին, երբ Վաշինգտոնի կողմից փորձ էր արվում իրավիճակը շտկել կամ խաղաղություն հաստատել։ Որևէ այլ բարձր մակարդակի հանդիպում հայ-ամերիկյան օրակարգում չի եղել»,- ասաց քաղաքագետը։
Նրա խոսքով, իհարկե եղել է անվտանգության հարցերով նախագահի խորհրդականի այցը Հայաստան, բայց դա եղել է իր նախաձեռնությամբ այց և առավելապես կրել է տարածաշրջաննային բնույթ, օրակարգն էլ սահմանափակվել է ավելի շատ Միացյալ Նահանգների քաղաքականության շրջանակներում՝ Իրանի և Ռւսաստանի նկատմամբ։
«Այնպես որ Բոլթոնի այցը միայն տարածաշրջանային է եղել։ Բարձր մակարդակի հանդիպումներ վարչապետի և Միացյալ նահանգների միջև չի եղել, ԱՄՆ նախագահի հետ որևէ զանգ, հեռախոսազրույց տեղի չի ունեցել վերջին երկուսուկես տարվա ընթացքում, և ընդհանուր առմամբ Թրամփի վարչակազմի հետ Հայաստանի իշխանությունների վարած քաղաքականությունը և աշխատանքը կարելի է գնահատել զրո»,- ասաց քաղաքագետը։
Դիտարկմանը, որ ԱՄՆ-ն նոր նախագահ ունի և ինչ անելիքներ կան, քաղաքագետն ասաց, որ կասկածում է, թե ՀՀ Արտաքին գործերի նոր նախարարը հայ-ամերիկյան այս ճահճացած հարաբերությունների դուրսբերման համար որևէ քայլ կձեռնարկի։
«Նախ սկսենք նրանից, որ այստեղ մենք շատ կարևոր գործիք ենք կորցրել, դա մեր համայնքն է, որը որ լուրջ ազդեդություն ունեցող համայնք է Վաշինգտոնում, և ցանկացած մեր նախաձեռնության կողքին կանգնած է, նաև բարձր՝ Կոնգրեսի մակարդակի հադիպումներ կազմակերպելու առումով։ ԱՄՆ հայ համայնքը շատ օգնում էր Հայաստանի իշխանություններին, սկսած 1990-ականների ամենասկզբից, իսկ հիմա այս համայնքային կառույցներն էլ են պահանջում վարչապետի հրաժարականը»,- ասաց քաղաքագետը։
Սուրեն Սարգսյանի խոսքով, սա նշանակում է, որ Վաշինգտոնում այս կազմակերպություները Հայաստանի իշխանություններին որևէ տեսակի օգնություն չեն ցուցաբերելու և դա էլ իր հերթին նշանակում է, որ մեր գործը բավականաչափ բարդացել է։ Քաղաքագետն ասաց նաև, որ մոտ ժամանակներում, ինքը չի ակնկալում, որ հայ-ամերիկյան հարաբերություններում դրական որևէ տեղաշարժ, հաշվի առնելով վերոնշյալ հանգամանքները։
«Կարծում եմ, Միացյալ նահանգների հետ հարաբերությունների վրա ՀՀ իշխանությունն առանձնապես ուշադրություն չի դարձնում։ Դրա մասին են խոսում հենց մեր արտաքին քաղաքական շփումները վերջին երկուսուկես տարվա ընթացքում։ Ամերիկյան կողմը, կարծես, ընդհանրապես մեզ համար մոռացված է եղել, մեր ակնկալիքները միգուցե այլ են եղել, քան իրականում կարող էին լինել։ Մեր իշխանությունները իշխանափոխությունից հետո մեծածավալ օգնություն նու ներդրումներ էին սպասում, սակայն այդպիսի բան բնականաբար տեղի չունեցավ։ Դրանից հետո ՀՀ իշխանությունները մեղադրեցին ամերիկացիներին, որ զրոյական օգնություն է ցուցաբերվել Հայաստանին, ինչն իհարկե այդպես չէր»,- ասաց քաղաքագետը։
Նա ընդգծեց՝ հայ- ամերիկյան հարաբերություններում հետևողական աշխատանք ընդհանրապես չի տարվել և դրա համար մենք ունենք այն պատկերը, որն առկա այսօր, իսկ հետևողական աշխատանքի բացակայությունը Սարգսյանը որակեց «կարողության բացակայություն»։