Հակամարտության շարունակությունը կախված է այն հանգամանքից, թե ինչ կարգավիճակ կունենա այն տարածքը, որը ներկա պահին պահպանում են մեր խաղաղապահները. ռուս փորձագետը ԼՂ-ում հնարավոր զարգացումների մասին
«Կոմսոմոլսկայա պրավդա» պարբերականի ռազմական թղթակից Ալեքսանդր Կոցը, որն արցախյան պատերազմի օրերին իրադարձությունները լուսաբանում էր Արցախից, ռուս փորձագետ Ալեքսեյ Լեոնկովի հետ զրուցել է 2021 թվականին Լեռնային Ղարաբաղում սպասվող զարգացումների մասին:
«Անցյալ տարվա ավարտին ողջ ուշադրությունը Լեռնային Ղարաբաղի կողմն էր: Արյունալի պատերազմը, ռուս խաղաղապահների մուտքը, բախումներն ադրբեջանցիներին անցած շրջաններում… Կարծում եմ նախկին հայկական տարածքներում որոշակի պարտիզանական պատերազմ կլինի 2021-ի ողջ ընթացքում: Ձմռան ամիսներին ինտենսիվությունը թույլ կլինի»,- կանխատեսում է ռազմական փորձագետը:
Նրա կարծիքով՝ հակամարտությունը հնարավոր կլիներ ավարտված համարել, եթե կողմերը բավարարված լինեին դրա արդյունքներից: «Հայաստանն իրեն պարտված է զգում, սակայն չի համաձայնում այն հանգամանքի հետ, որ կորցրել է. այնտեղ ներպետական ճգնաժամ է՝ կապված վարչապետի և նրա շրջապատի հետ: Ադրբեջանում, թեև հաղթանակի շքերթ են անցկացրել, դժգոհություն կա իրենց դաշնակցի՝ Թուրքիայի կողմից, որը կարծում է, որ հնարավոր էր առավել արմատական արդյունքների հասնել և չկնքել այդ համաձայնագիրը»,- նշում է Լեոնկովը՝ հավելելով. «Հակամարտության հնարավոր շարունակությունը կախված կլինի այն հանգամանքից, թե ինչ կարգավիճակ կունենա այն տարածքը, որը ներկա պահին պահպանում են մեր խաղաղապահները»:
«Կստանա՞ արդյոք այդ տարածքը միջազգային կարգավիճակ, թե՞ ոչ: Դա անկյունաքարն է, որը թույլ չի տալիս վերջակետ դնել կամ գոնե պարզություն սահմանել»,- ընդգծել է Լեոնկովը:
Անդրադառնալով Թուրքիայի դերակատարությանը՝ փորձագետը շեշտել է, որ այն «մեծ խաղի մի տարրն է, որը Ռուսաստանի դեմ վարում է Բրիտանիան»: «Լոնդոնը սեփական մարդկային ռեսուրսներ չունի, որպեսզի բացեիբաց հանդես գա և առաջ մղի իր զորքերը: Սակայն ունի մեծ ներուժ, ինչպես նաև լծակներ՝ կառավարելու այնպիսի ռեսուրսներ, ինչպիսին Թուրքիան է»,- կարծիք է հայտնել փորձագետը:
Նրա կարծիքով՝ առավել թույլ տնտեսություն ունեցող Թուրքիայի ընդլայնման գաղափարների հետևում կանգնած են ֆինանսապես հզոր երկրներ, ինչպիսին Բրիտանիան է:
Հիշեցնենք, որ Նիկոլ Փաշինյանը 2020 թվականի նոյեմբերի 10-ին ստորագրել է եռակողմ հայտարարություն, որով Ադրբեջանին են անցնել Արցախի յոթ շրջանները, Շուշին ու Հադրութը, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։
Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա: