Մերձավոր Արևելքի երկրներ Գերմանիայից զենքի արտահանումն անցել է 1 մլրդ եվրոյից

Մերձավոր Արեւելքում երկու՝ Եմենում եւ Լիբիայում հակամարտությունների մասնակից երկրները Գերմանիայից ստացել են 1,16 մլրդ եվրո ընդհանուր գումարի սպառազինություն: Նման գումար է նշված «կանաչների» խմբակցության արտաքին քաղաքականության հարցերով փորձագետ Օմիդ Նուրիփուրի հարցմանը Գերմանիայի էկոնոմիկայի նախարարության պատասխանում, որը հունվարի 3-ին հրապարակել է գերմանական dpa լրատվական գործակալությունը:

Միաժամանակ 2020 թվականին Գերմանիայի զենքի արտահանման ընդհանուր ծավալները կրճատվել են: Մինչեւ դեկտեմբերի 10-ը տրվել են 5,635 մլրդ եվրո ընդհանուր գումարի սպառազինության եւ տեխնիկայի մատակարարումների թույլտվություններ: Մեկ տարի առաջ սահմանվել էր ռեկորդ՝ 8,015 մլրդ եվրո, փոխանցում է DW-ն:

2020 թվականին Գերմանիայից Մերձավոր Արեւելք զենքի արտահանման մեծ մասը բաժին է ընկել Եգիպտոսին. Գերմանիայի կառավարությունը թույլ է տվել այս երկիր 752 մլն եվրոյի ռազմական արտահանում: Զենքի խոշոր մատակարարումները հավանություն են ստացել Կատարի (305,1 մլն եվրոյի), Արաբական Միացյալ Էմիրությունների (51,3 մլն եվրոյի), Քուվեյթի (23,4 մլն եվրոյի), Թուրքիայի (22,9 մլն եվրոյի), Հորդանանի (1,7 մլն եվրոյի) եւ Բահրեյնի համար (1,5 մլն եվրոյի):

Գերմանիայի կառավարությունը դեկտեմբերին մինչեւ 2021 թվականի վերջը երկարաձգել էր Սաուդյան Արաբիայի սպառազինության արտահանման արգելքը՝ միաժամանակ խստացնելով մինչեւ հիմա գործող կարգադրությունները: Չեղարկման են ենթակա անգամ այն թույլտվությունները, որոնք արդեն տրվել էին, բայց սառեցվել:

Մեկ տարի առաջ Լիբիայում հակամարտության կարգավորման նպատակով Բեռլինում տեղի էր ունեցել բարձր մակարդակով հանդիպում: Հանդիպման մասնակիցները պարտավորվել էին պահպանել զենքի մատակարարման էմբարգոն, որը մտցվել է արդեն 9 տարի առաջ: Բայց անգամ դրանից հետո, ՄԱԿ տեղեկություններով, Լիբիա, միեւնույն է, զենք է մատակարարվել, այդ թվում՝ Թուրքիայից եւ ԱՄԷ-ից: