Մենք պետք է պայքարենք հանուն հաղթանակի, ոչ թե հանուն հարմարվելու. Տեր Եսայի քահանա Արթենյան
Դժվար է ինչ-որ բան ասել անցնող տարվա հետ կապված, քանի որ ամենակարևոր խնդիրը, որին մենք անդրադառնում ենք, մեր կորցրած հայրենիքը և հազարավոր զոհերն են: Այս մասին Tert.am-ի հետ զրույցում ասաց Տեր Եսայի քահանա Արթենյանը՝ անդրադառնալով 2020 թվականի ամփոփմանը:
«Ես կարծում եմ, որ հույսերը 2021 թվականի հետ կապված դատարկ են, եթե մենք այդ զոհերին և կորցրած հայրենիքը չենք գնահատում»,- ասաց նա և նշեց, որ եթե այս ազգը այսպես է այսօր մտածում, երբեք ոտքի չի կանգնի:
Տեր Եսային ասաց, որ այս տարի ավելի շատ մեր ուշադրությունը, հայացքը ուղղում ենք դեպի Սուրբ ծնունդ:
«Բնականաբար, Նոր տարուն տոնական տրամադրության ցանկություն չկա, և ոչ էլ այդ տրամադրությունը կա, բայց հոգևոր իմաստով մեր հայացքը ուղղում ենք Սուրբ ծնունդ և Սուրբ ծննդյան խորհուրդ, քանի որ Քրիստոսի ծննդյան խորհրդի մեջ է, որ մենք պետք է կարողանանք ոչ թե ամփոփել տարին և հույսով նայել նորին, այլ անցած տարվա կորցրածը վերաիմաստավորել, հասկանալ և կորցրածը հետ բերել, հույսը դրա մեջ է»,- ասաց նա:
Տեր Եսային նշեց, որ տանը տոնածառ դնել կամ չդնելով, մենք ոչ հարգում ենք, ոչ էլ անարգում ենք զոհվածների հիշատակը, յուրաքանչյուր ընտանիք ինքն է որոշում՝ իր երեխային ինչպես դա բացատրի:
«Տոնածառ չդնելով չի դրսևորվում մեր հարգանքը զոհված զինվորների նկատմամբ»,- ասաց նա:
Նա նկատեց, որ ատելությունը, անհանդուրժողականությունը շատ տարածված են մեզանում, և ելքը մեկն է՝ հասկանալ, որ մարդիկ իրավունք ունեն այլ կարծիք ունենալու:
«Այս ամենի ելքը քրիստոնեական սիրո և այն գիտակցումի մեջ է, երբ մենք պետք է հասկանանք, որ բոլորս մի ընտանիքի անդամ ենք և անկախ նրանից, թե քաղաքական, հասարակական ինչ հայացքներ ունենք, պետք է համախմբվենք: Եթե ուզում ենք այս իրավիճակից դուրս գալ, Աստվածային սերը, մեկը մյուսի նկատմամբ կարեկցանքը, հոգածությունը, քրիստոնեական այս արժեքները պետք է զորանան: Բուժման մեկ միջոց կա՝ մենք պետք է պայքարենք հանուն հաղթանակի, ոչ թե հանուն հարմարվելու իրավիճակին: Բուժումը մանուկ Հիսուսին մեր սրտում, հոգում, մտքում ընդունելու մեջ է, եթե բեթղեհեմյան քարայրը դառնա մեր միտքը, մեր հոգին և իրապես թույլ տանք, որ մանուկ Հիսուս ծնվի մեր հոգում, այդ դեպքում կարծում եմ, որ կկարողանանք բուժել մեր վերքերը»,- հավելեց նա: