Նիկոլ Փաշինյանը պետական մարդ չէ, չգիտի՝ ինչ է պետությունը, պատրաստ է ամեն ինչ զոհել, բացի իր աթոռից, թեև ասում էր՝ այդ աթոռից չեմ կառչելու. Գևորգ Գորգիսյան (տեսանյութ)
Նիկոլ Փաշինյանից ոչ թե արտահերթ խորհրդարանական ընտրություններ, այլ հրաժարական ենք պահանջում, պետք է պրոֆեսիոնալներից կազմված կառավարություն ձևավորվի, որը երկիրը դուրս կբերի քաոտիկ վիճակից․ ինչպե՞ս է նա քարոզարշավ ապահովելու, եթե նույնիսկ իր պատգամավորների մուտքը ԱԺ չի կարողանում ապահովել: «Արմնյուզ» ՀԸ «#ՕրաԽնդիր» հաղորդման ժամանակ նման կարծիք է հայտնել ՀՀ ԱԺ «Լուսավոր Հայաստան» խմբակցության քարտուղար Գևորգ Գորգիսյանը:
«ԼՀԿ-ն չի մասնակցելու Նիկոլ Փաշինյանի հրավիրած խորհրդակցություններին։ Մենք պնդում ենք, որ իր ղեկավարման ներքո անհնար է կազմակերպել անաչառ և հավասար ընտրություններ։ Այսօր երկրում անիշխանություն է, ամեն գյուղում կարող են լինել բախումներ, ծեծկռտուք, անթույլատրելի է այդպես գնալ ընտրությունների։ Երկիրը կայունացնելուց հետո միայն՝ մոտ մեկ տարի անց, հնարավոր կլինի ձևավորել խորհրդարան և կառավարություն»,- ասել է պատգամավորը:
Ըստ Գորգիսյանի՝ հաջորդ կառավարությունը չի լինի միակուսակցական, այն կլինի կոալիցիոն, և Փաշինյանի ուժը չի լինի դրանում. «Վարչապետը կարծում է, թե իր վարկանիշը բարձր է, և ընտրություններն ուշացնելը կարող է նրան քվե արժենալ։ Երբ նա հրաժարական տա, մենք կառաջադրենք մեր թեկնածուին, կտեսնենք՝ կա՞ իշխող դաշինքի կուռ ամրությունը։ Ի վերջո, բոլոր օրակարգերը որոշվում են ԱԺ-ում, նա պետք է հրաժարական տա, և ԱԺ-ն երկու անգամ չպետք է վարչապետ ընտրի։ Նիկոլ Փաշինյանի կազմակերպած ընտրությունները լեգիտիմության խնդիրներ են ունենալու»:
Քաղաքական գործչի կարծիքով՝ հիմա պետականությունը կիսախարխլված է, պարզ է, որ եկողը չի վայելելու, սա մեծ խաչ է, որը կարող է նույնիսկ քաղաքական կարիերայի վերջ արժենալ. «Հիմա կա քաղաքական թիմ, որը քանդվում է։ Վարչապետը պատրաստ է ամեն ինչ զոհել, բացի իր աթոռից, վնաս տալ երկրին, բայց չհեռանալ, աթոռը նրա կյանքի նպատակն է դարձել, թեև ասում էր՝ աթոռից կառչած չի լինի։ Այսօր կա վարչապետի հրաժարականի հանրային պահանջ, ամեն օր նա երկիրը տանում է տապալման։ Եվ վախենալով, որ իրենց նկատմամբ հաշվեհարդար կտեսնեն՝ իմքայլականները բյուրեղանում են»:
Գևորգ Գորգիսյանի պնդմամբ՝ այսօր երկրում կա «կոնսենսուս մինուս մեկ»՝ բոլորը պահանջում են Փաշինյանի հրաժարականը՝ բացի իրենից. «Նիկոլ Փաշինյանին միայն հանրահավաքներով չի լինի հեռացնել, մենք դրանք ողջունում ենք, մարդիկ ունենք իրենց արդար ցասումն արտահայտելու իրավունքը։ Փաշինյանին իր իսկ ձեռագրով չի լինի հեռացնել։ Նա պետական մարդ չէ, չգիտի՝ ինչ է պետությունը, նրան մեկ է, երբ անգամ պետական ամենակարևոր ինստիտուտները քանդվեն»:
Ընդդիմադիր պատգամավորի պնդմամբ՝ Սյունիքում քաղաքացիներն իրենց անվտանգ չեն զգում, պետք են անվտանգության լրացուցիչ երաշխիքներ, մարզը կարող է դատարկվել: «Մեզ 44 օր ստել են, քաղաքացիների հավատը կորել է, պետք են քայլեր՝ բանակի մարտունակությունը բարձրացնելու նպատակով։ Քաղաքացուն պետք է երաշխիք, որ նա ինքն իր տանն անվտանգ է։ Նիկոլ Փաշինյանը կոտրեց մեր բանակի հեղինակությունը»,- ամփոփել է ՀՀ ԱԺ ԼՀԿ խմբակցության քարտուղարը: