Իրանի կողմից հարվածի հավանականության ֆոնին՝ ԱՄՆ-ն քննարկում է Իրաքում դեսպանատունը փակելու հնարավորությունը. Axios

ԱՄՆ իշխանություններն, ըստ ամերիկյան լրատվամիջոցների, քննարկում են Իրաքում իրենց դեսպանատունը փակելու հնարավորությունը, նշվում է Axios լրատվական գործակալության հրապարակած հոդվածում:

Պատճառը դիվանագիտական առաքելության հերթական գնդակոծությունն է, որի կազմակերպման պատասխանատվությունը Վաշինգտոնը դրել է Թեհրանի վրա: Իրանի ղեկավարությունն իր հերթին պնդում է, որ խոսքը ԱՄՆ-ի նախագահ Դոնալդ Թրամփի ու նրա վարչակազմի կողմից «անխոհեմ մեղադրանքների» մասին է: Թեհրանը նախազգուշացնում է, որ՝ ամերիկյան ղեկավարության «ցանկացած արկած» անպատասխան չի մնալու:

Բաղդադում ԱՄՆ-ի դեսպանատան փակումը Վաշինգտոնի գործունեության տարբերակներից մեկն է՝ ի պատասխան մայրաքաղաքի «Կանաչ գոտու» գնդակոծման, որտեղ գտնվում են Իրաքում գործող դիվանագիտական առաքելություններն ու պետական գործակալությունները: Այս մասին չորեքշաբթի օրը հաղորդել է Axios ամերիկյան հրատարակությունը՝ վկայակոչելով երկու աղբյուր: «Կանաչ գոտու» գնդակոծումը Բաղդադում պարբերական բնույթ է կրում: Կիրակի գիշեր տեղի ունեցած վերջին հարձակման ժամանակ ամերիկյան դեսպանատունը փոքր-ինչ վնասվել է: Դիվանագիտական առաքելության տարածքում, որն իր պաշտպանության համակարգով ռազմաբազա է հիշեցնում, աշխատել է C-RAM մարտական հակաօդային պաշտպանության համակարգ: Ավելի ուշ Իրաքի իշխանությունները հայտնել են արձակման կայանքի հայտնաբերման մասին:

Հունվարի սկզբին ամերիկյան ռազմական գործողության հետևանքով Իրաքում սպանվել էր Իրանի Իսլամական հեղափոխության պահապանների կորպուսի հրամանատար Ղասեմ Սոլեյմանին: Այս միջադեպը միայն ավելի է սրել երկու երկրների հարաբերությունները:

Ըստ լրատվականի, դեսպանատան փակումը կարող է նախերգանք հանդիսանալ Իրանի դեմ պատասխան գործողությունների համար՝ նախքան հունվարի 20-ին ԱՄՆ-ի նախագահ Դոնալդ Թրամփի վարչակազմի հեռացումը:

«Կիրակի օրը Բաղդադում մեր դեսպանությունը խոցվեց մի քանի հրթիռներով, որոնցից երեքը չեն գործարկվել: Գուշակեք, թե որտեղից են դրանք՝ Իրան: Այժմ մենք լսում ենք Իրաքում ամերիկացիների դեմ այլ հարձակումների վերաբերյալ շշուկներ... », - գրել է Թրամփն իր թվիթերյան էջում:

Նա բարեկամական և օգտակար խորհրդի տեսքով հավելել է, որ եթե մեկ ամերիկացի զոհվի, ապա ինքը պատասխանատվության է ենթարկելու Իրանին և հորդորել է լավ մտածել: ԱՄՆ-ի Պետքարտուղար ՄԱյք Պոմպեոն, իր հերթին, մեղադրել է Իրանին այս գործողության համար:

Axios-ի հոդվածն առաջին ազդանշանը չէ Իրաքում ԱՄՆ-ի դեսպանատունը փակելու վերաբերյալ: Նմանատիպ հոդված հրապարակվել էր սեպտեմբերին The Wall Street Journal- ում: Եվ երեք շաբաթ առաջ հայտնի դարձավ, որ ԱՄՆ-ը պլանավորվում է ժամանակավորապես (մինչև հունվարի կեսերը) հետ կանչել Բաղդադում դեսպանատան անձնակազմի մի մասին՝ հունվարի 3-ին Ղասեմ Սոլեյմանիի մահվան տարելիցին ընդառաջ Թեհրանի կողմից վրեժ լուծելու մտավախությունների պատճառով: Եվ քանի որ այս ամսաթիվը մոտենում է, ինչպես նաև մոտենում է նախագահ Թրամփի լիազորությունների հանձնման օրը, Իրանի շուրջ իրավիճակն ավելի է սրվում: Այս շաբաթ Պարսից ծոց են մտել ԱՄՆ-ի միջուկային սուզանավ և երկու նավ: Ըստ ԶԼՄ-ների, Պարսից ծոցում է տեղակայվել նաև իսրայելական սուզանավ: Բացի այդ նոյեմբերի վերջին B-52H Stratofortress ռազմավարական ռմբակոծիչները տեղափոխվել են Մերձավոր Արևելք: