Թող Փաշինյանն անընդհատ փախչի, մարդիկ էլ գոռան՝ «դավաճան, թուրք», այդպես հնարավո՞ր է երկիր պահել․ Իշխան Սաղաթելյան
Նիկոլ Փաշինյանը պետք է արժանապատվության նշույլ չունի, դա գիտենք, պետք է մտածի մեր պետության ու ժողովրդի մասին, և րոպե, վայրկյան առաջ հեռանա։ Սա չարիքի կառավարություն է, նա մեր երկիրը տանում է վերջնական կործանման։ Այս մասին կառավարության դիմաց բողոքի ակցիայի ընթացքում լրագրողների հետ զրույցում ասաց ՀՅԴ ԳՄ ներկայացուցիչ Իշխան Սաղաթելյանը։
Նրա խոսքով՝ ՀՀ քաղաքացին պետք է գա հրապարակ և հեռացնի Փաշինյանին, հակառակ դեպքում՝ հաջորդելու է սոցիալ-տնտեսական աղետը։
«Ոստիկանները, որոնցից ոմանք իրենց լկտի են պահում, երկու ամիս հետո աշխատավարձ չեն ստանալու, քաղաքացիները թոշակ չեն ստանալու։ Այս մարդը մեր երկիրը հասցնելու է մի իրավիճակի, որ ոչ մեկը չուզենա այստեղ ապրել։ Մենք սա գիտակցում ենք ու դրա համար դուրս ենք եկել պայքարի»,-ասաց նա՝ նշելով, թե իրենց պայքարը հայրենիքի փրկության համար է։
«Եթե Նիկոլ Փաշինյանին հաջողվում է մի անցք գտնել, փախչել, դա մեզ չի հուսահատեցնելու։ Փաստ է, որ երեք ժամ է, կառավարություն ելումուտ չկա։ Մի խելագարի պատճառով մարդիկ գերության մեջ են, ոչ միայն իրենք, այլ բոլորս, ազգովի։ Ոնց կարող է մի մարդ երկիրը հասցնել այս իրավիճակին ու շարունակել փախչելով, թաքնվելով պաշտոնավարել»,-ասաց Սաղաթելյանը։
Նա ընդգծեց՝ Փաշինյանը զորքով է Սյունիք գնում, վաղը Գեղարքունիք չի կարողանա գնալ, որովհետև նրա գործունեության արդյունքում Գեղարքունիքի սարերում արդեն թուրքական զորք է կանգնած։
«Պետք է նայել ու հասկանալ՝ Նիկոլ Փաշինյանն ինչ աղետի է բերել երկիրը։ Թող անընդհատ փախչի, մարդիկ էլ գոռան՝ դավաճան, թուրք, այդպես հնարավո՞ր է երկիր պահել։ Այս տեմպերով այս աղետը գալու է Երևանի կենտրոն։ Մենք կորցրել ենք մեր երկրի անվտանգությունը։ Նոր բանակցողը կարող է բազմաթիվ հարցեր լուծել և փրկել մեր երկիրը»,-ասաց Սաղաթելյանը՝ նշելով նաև, որ Փաշինյանը հասարակության միջև հին ու նոր արեց, սև-սպիտակ արեց, հեղափոխական-ոչ հեղափոխական արեց, հիմա էլ ասում է՝ էլիտա-ժողովուրդ՝ այդպիսով շարունակելով հասարակության պառակտումը։
Սա մեր ժողովրդի շահերի պաշտպանության հետ որևէ առնչություն չունեցող կառավարություն է, որի գործունեության հետևանքով մենք օրեցօր կորցնում ենք մեր պետականությունը և գտնում ենք՝ իրենք անելիք չունեն, պետք է թողնեն հեռանան, կարծում է Իշխան Սաղաթելյանը:
Նա նշեց, որ այս կառավարության գործունեությունը տանում է կործանման: «ՀՀ քաղաքացիները պետք է հասկանան, որ բացի ազգային աղետից, այս կառավարությունը՝ այս խեղկատակի գլխավորությամբ, եթե շարունակի իր գործունեությունը, ապա այս ոստիկանները, որ այստեղ կանգնած են, ընդամենը 2 ամիս հետո աշխատավարձ չեն ստանալու, թոշակառուն թոշակ չի ստանալու, մեր երկիրը հայտնվելու է սոցիալ- տնտեսական կոլապսի մեջ, երկրին սպասվում է հումանիտար աղետ: Հիմիկվանից զգուշացնում ենք, ոնց որ այն ժամանակ ասում էինք՝ այս մարդը տալու է Արցախը, պետականություն է կործանելու, ոնց որ ասում էինք՝ Սյունիքն է տալու. այսօր Սյունիքին մեծ վտանգ է սպառնում, վաղը այդ նույնը լինելու է Վայոց Ձորում, մինչև Երևանի կենտրոն, եթե այս կառավարությունը մնա: Պետք է բոլորս գիտակցենք, որ սա չարիքի կառավարություն է»,- հայտարարեց նա:
Սաղաթելյանը նշեց, որ Նիկոլ Փաշինյանը շարունակում է մոլորեցնել մեր հասարակությանը, կրկին դարձնում է հնի ու նորի պայքար, բայց սա հնի ու նորի պայքար չէ, սա իշխանություն- ընդդիմություն պայքար չէ, մեր պետականությունը կործանման եզրին է, այս մարդը երկիրը հետևողականորեն տանում է կործանման:
Դիտարկմանը՝ չնայած կառավարության շենքը շրջափակելու կոչերին, կառավարութան նիստն այդուհանդերձ տեղի ունեցավ, նա նշեց. «Այս կառավարությունը նիստ է անում, որ ի՞նչ անի, հիմա ո՞ւմ է խաբում, հիմա ի՞նչ է հանձնում, այդ նիստերը մեր ժողովրդի շահերից չեն բխում: Հիմա կառավարության անդամները գտնվում են շենքում շրջափակման մեջ, երկու ժամ է՝ շենք ելումուտ չկա»:
Ինչ վերաբերում է մեղադրանքներին, որ ընդդիմությունն անվճռական է, դրա համար օրեցօր հանրահավաքի մասնակիցների թիվը նվազում է, Սաղաթելյանն ասաց. «Այդ մտահոգությունը կա, մեզ դիմում են բազմաթիվ քաղաքացիներ, թե դիմեք վճռական գործողությունների, ես գտնում եմ, որ սա վճռական գործողություն է: Այն քաղաքացիները, որոնք մեզանից հիասթափվում են, թե վճռական գործողությունների չենք դիմում, հենց հիմա թող գան հրապարակ, կառավարության ամբողջ կազմը գտնվում է շենքում, սրանից վճռական մենք ի՞նչ գործողություններ պետք է անենք»:
Նա նշեց, որ ամբողջ կառավարության կազմը գտնվում է շրջափակման մեջ մի գրամ արժանապատվություն ունեցող կառավարությունը պետք է հրաժարական տար. «Վարչապետը, որը իր երկրի տարածքում շրջափակված է ոստիկաններով, իր երկրի տարածքում շարժ չի կարողանում իրականացնել, այդ մարդն ի վիճակի՞ է երկրի առջև կանգնած մարտահրավերները լուծելու, նա ի վիճակի՞ է մեր երկրի համար բարիք բերելու»,- ասաց նա:
Ոստիկանական խիտ պատնեշից այն կողմ. Փաշինյանն անվրդով կառավարության նիստ էր անցկացնում
Արձակուրդ եկած զինվորներին երեկ չեն թողել ուղեւորվել Արցախ. Գեղամ Մանուկյանը դիմեց Օնիկ Գասպարյանին