Իշխանության և ՀՀԿ-ի տարբերությունն այն է, որ այս իշխանությունը սերմանել է ատելություն․ Դավիթ Հարությունյան
Յուրաքանչյուրը պետք է իրեն հարց տա՝ ինչո՞վ է պայմանավորված, որ հենց մեր սահմանի վրա Ադրբեջանը սկսել է կառուցել խոշոր ռազմաբազաներ եւ տեղակայել հարձակողական զենքեր։ Այս մասին այսօր՝ դեկտեմբերի 24-ին Կառավարության դիմաց լրագրողների հետ զրույցում ասաց Արդարադատության նախկին նախարար Դավիթ Հարությունյանը։
«Այո, ես հասկանում եմ, որ շատերի հույսն այն է, որ այսօր Ռուսաստանը թույլ չի տա Հայաստանի տարածք ներխուժել, չնայած դա փաստացի տեղի է ունենում, բայց Ադրբեջանն այսօր պատրաստվում է այն պատերազմին, որին մասնակցելու են մեր երեխաներն ու թոռները։ Եվ դա չնկատել անթույլատրելի է»,- ընդգծեց Հարությունյանը։
Դիտարկմանը, թե կան քաղաքացիներ, որոնք ասում են՝ լավ է Նիկոլ Փաշինյանը մնա, քան Հանրապետականը հետ գա իշխանության, Դավիթ Հարությունն ասաց «Չկա իշխանություն, որ սխալներ թույլ չի տվել, ՀՀԿ-ն եւս բացառություն չէ։ Եթե լինեին իշխանություններ, որոնք սխալներ թույլ չտային, նրանք երբեւէ չէին փոխվի։ ՀՀԿ-ն սխալներ ունեցել է, բայց ո՞րն է տարբերությունը ՀՀԿ-ի եւ այս իշխանության։ Կարծում եմ ոչ թե այն՝ որ այս իշխանությունն ավելի ժողովրդավար է, ոչ, դա այդպես չէ, ոչ թե այն՝ որ այս իշխանությունն ավելի հակված է իրավական պետություն ունենալուն, այլ այն, որ այս իշխանությունը սերմանել է ատելություն, պատմությունից հայտնի է՝ պետք է բաժանել, որպեսզի տիրես։ Եթե ներքին թշնամի չկա, պետք է ստեղծել։ Այդ հոգեբանական հնարքը ցավոք, աշխատել է տարիների ընթացքում տարբեր երկրներում եւ կործանել է տարբեր երկրներ։ Այդ ամենն այս պահին տեղի է ունենում մեր երկրում»։
Լրագրողի դիտարկամնը, թե ինչպես Նիկոլ Փաշինյանի իշխանությունը հասարակությանը սեւ ու սպիտակների բաժանեց, այնպես էլ հիմա են հասարակությանը էլիտա ու ժեխ անվանում։
«Կարծում եմ այդ բաժանումը չի գալիս հարթակից եւ ընդդիմությունից, դա այն արհեստական բաժանումն է, որ շարունակում է անել իշխանությունը, փորձելով ինչ-որ մասի մոտ վիրավորվածություն զգացում առաջացնել։ Չի կարելի ժողովրդին բաժանել, եւ դա շատ լավ հասկանում է հարթակը, նրանք, ովքեր ասում են՝ մեր երկիրը կործանվում է։ Դա է պատճառը, համենայնդեպս իմ շրջապատում ես չեմ լսել, որ որեւէ մեկը, հասարակությանը բաժանի էլիտայի եւ ժեխի, բայց դա անում է հենց իշխանությունը»,- նշեց Դավիթ Հարությունյանը։
Հիշեցնենք, որ Կառավարության նիստին զուգահեռ, դրսում՝ վարչապետ Նիկոլ Փաշինյանի հրաժարականի պահանջով բողոքի ակցիա էր: