Ոստիկանական խիտ պատնեշից այն կողմ. Փաշինյանն անվրդով կառավարության նիստ էր անցկացնում
Ինչպես արդեն նշել էինք, Վարչապետ Նիկոլ Փաշինյանն այսօր՝ դեկտեմբերի 24–ին ոստիկանական խիտ պատնեշի հետևում անվրդով կառավարության նիստ էր անցկացնում։ Այդ ընթացքում կառավարության շենքի դիմաց հավաքված բազմաթիվ քաղաքացիներ պահանջում են նրա հրաժարականը։ Կառավարության նիստին զուգահեռ, դրսում՝ վարչապետ Նիկոլ Փաշինյանի հրաժարականի պահանջով բողոքի ակցիա է:
Նախօրեին ընդդիմությունը հայտարարել էր շենքը շրջափակելու մտադրության մասին։ Սակայն կառավարության հետևի մուտքը առավոտից արդեն փակ էր ոստիկանական շղթայով, որտեղից էլ մուտք գործեցին կառավարության անդամների ավտոմեքենաները։
Նիստի օրակարգում ընդգրկված է 47 հարց, որից 44-ը չի զեկուցվում:
Օրակարգում են, մասնավորապես, հետեւյալ հարցերը.
- Պահեստազորի սպայական կազմի պարտադիր զինվորական ծառայության 2020 թվականի զորակոչ հայտարարելու և զորացրում կատարելու մասին,
- Արցախի նախադպրոցական տարիքի երեխաների ամանորյա աջակցության միջոցառումը հաստատելու մասին,
- Ադրբեջանի կողմից 2020 թվականի սեպտեմբերի 27-ին սանձազերծված ռազմական գործողությունների հետևանքով անհայտ կորած զինծառայողների ընտանիքներին ամենամսյա դրամական վճար տրամադրելու կարգը հաստատելու մասին,
- Կորոնավիրուսի տնտեսական հետևանքների չեզոքացման երկրորդ միջոցառման շրջանակում «Տոհմային տավարաբուծության նախագիծ» գյուղատնտեսական կոոպերատիվին վարկի համաֆինանսավորման ձևով օժանդակություն տրամադրելու մասին,
- Երևան քաղաքի Մամիկոնյանց և Արամ Խաչատրյան փողոցներին հարակից տարածքների նկատմամբ հանրության գերակա շահ ճանաչելու մաuին և այլ հարցեր:
«Քաղաքացիներն աջակցում են ոստիկաններին՝ շրջափակել Կառավարության շենքը, որ նախարարները մուտք չգործեն։ Եթե գաղտագողի էլ մտել են, ապա դուրս գալու հնարավորություն չեն ունենա։ Նշանակում է՝ մի Կառավարություն, որը չի կարող բաց երեսով իր վարչապետի հետ մուտք գործել Կառավարություն, նա դադարում է ժողովրդի Կառավարություն լինել»,- այս մասին այսօր՝ դեկտեմբերի 24-ին, Նիկոլ Փաշինյանի հրաժարականի պահանջով բողոքի ակցիայի ժամանակ լրագրողների հետ զրույցում ասաց ՀՅԴ անդամ Գեղամ Մանուկյանը։
Մանուկյանն ընդգծեց, որ Հայաստանի Հանրապետությունում ստեղծվել է մի իրավիճակ, որ այլևս օրենք, պետական կառավարման համակարգ դադարում է գոյություն ունենալ. «Անցած հինգշաբթի Կառավարության նիստում, Կառավարությունը չվավերացրեց Տնտեսագիտական համալսարանի ռեկտորի ընտրությունը։ Երեկ Կառավարությունը վավերացրել է՝ նիստ չանելով։ Նիկոլ Փաշինյանն այնպես է ավիրել պետական համակարգը, որ առանց Կառավարության պաշտոնական նիստի վավերացրել է Տնտեսագիտական համալսարանի ռեկտորի ընտրությունը»։
Նշենք նաև, որ Վարչապետ Նիկոլ Փաշինյանի հրաժարականի պահանջով Կառավարության բոլոր մուտքերն ու ելքերն արգելափակած քաղաքացիները փորձում էին խոչընդոտել նաև Կառավարության աշխատակցի մուտքը։
Ոստիկանների միջամտությամբ աշխատակիցը կարողացավ մուտք գործել շենք։
«Ես ձեզ չեմ հարգում։ Ես կկախեի ինձ։ Ով Նիկոլի մոտ ա աշխատում՝ ամոթ»,- նրան ասում էին քաղաքացիները։
Նշենք, որ ոստիկանական ուժերը վաղ առավոտյան երկու կողմից փակել էին Մելիք Ադամյան փողոցը: Բացի այդ, ոստիկաններով լի ավտոբուսներ են բերել Կառավարության շենքի մոտ:
Ոստիկանները 5-6 շարքով շղթա են կազմել կառավարության շենքի դիմաց: Նրանք սաղավարտներով և վահաններով են:
ՀՅԴ ԳՄ անդամ Արծվիկ Մինասյանը դիմելով Կառավարության անդամներին, ընթերցեց պարտականությունները ստանձնելուց առաջ նրանց երդման տեքստը, ապա Մինասյանը հայտարարեց․ «Ժողովրդի առջեւ ձեր ունեցած առաջին պարտավորությունն է կատարել ժողովորդի պահանջը, այն է՝ վարչապետ Նիկոլ Փաշինյանին պաշտոնանկ անել, երկրորդ պահանջն է՝ ինքնիշխանությանը եւ Հայաստանի շահերի պաշտպանությանը դավաճանած մարդուն հեռացնել պաշտոնից: Կառավարության յուրաքանչյուր անդամ իր համար սա որպես Սահմանադրությամբ եւ օրենքով նախատեսված պահանջ պետք է ընդունի: Դրանից ելնելով՝ եթե ձեզնից յուրաքանչյուրը չկատարի այս պահանջը, կհամարվի երդմնազանց, հայ ժողովրդի թշնամի, հակառակորդ, քանի որ ՀՀ անվտանգությանը սպառնում է կործանում»։
Մինասյանի խպոսքով՝ ՀՀ յուրաքանչյուր քաղաքացու համար այսօր Հայաստանը դարձել է վտանգավոր վայր։
«Դավաճանը պետք է դատվի, երաշխավորում ենք, որ արդար դատական համակարգով նա կստանա իր արժանի պատիժը, բայց դրա համար չափազանց կարեւոր է, որ ձեզնից յուրաքանչյուրը, հանած վարչապետին՝ 14 կառավարության անդամ, եթե ներսում եք արդեն, պատրաստվեք, որպեսզի քվեարկեք պաշտոնանկ անելու համար ՀՀ գլխավոր դավաճանին»,- հայտարարեց Մինասյանը՝ պահանջելով Նիկոլ Փաշինյանի հեռացումը։
Նիկոլ Փաշինյանի հրաժարականի պահանջով Կառավարության շուրջբոլորը հավաքված քաղաքացիները պատրաստվում են թույլ չտալ գործադիրի անդամներին դուրս գալ շենքից։ Այս մասին էլ լրագրողների հետ զրույցում ասաց ՀՅԴ ՀԵՄ անդամ Քրիստինե Վարդանյանը։
«Մենք բազմիցս խոսել ենք այն մասին, որ Հայաստանում վարվում է ապազգային եւ կործանարար քաղաքականություն։ Ցավոք, կանխատեսումներն ամենավատ ձեւով իրականություն դարձան։ Մենք չէինք կարող պատկերացնել, որ Հայաստանում ապազգային քաղաքականության հետեւանքով հայրենիքի կորուստ կունենանք եւ այդ մադիկ, որոնք մեղավոր են դրանում՝ կհավակնեն ավելի շատ զիջել, ավելի շատ վնասել մեր հայրենիքը, ու կհավակնեն մնալ իրենց պաշտոններում։ Մենք այսպիսի սցնենար չէինք կանխատեսել, բայց դա արգելք չի կարող հանդիսանալ, որ չշարունակենք պայքարը»,- նշեց նա։
Անդրադառնալով իշխանական պատգամավորների հայտարարություններին, թե Նիկոլ Փաշինյանի հրաժարականը պահանջողները որտե՞ղ էին, երբ պատերազմ էր ընթանում, Քրիստինե Վարդանյանն ասաց, որ այս օրերին ամենաբարկացնողը այդ պարգեւավճար ստացողներն են, որոնք երկուսուկես տարվա ընթացքում որեւէ խնդիր չկարողացան լուծել եւ հիմա էլ տարատեսակ հայտարարություններ են անում։
«Չգիտեմ, թե դուք որտեղ եք եղել։ Հայ ժողովուրդը ձեզ չտեսավ պատերազմի ընթացքում։ Դուք չկարողացաք ժողովրդի հոգսերը թեթեւացնել, մի քանի մարդու կյանք չկարողացաք փրկել, որեւէ ձեւ չկանխեցիք հայրենիքի կորուստը։ Ու հիմա եկել, մեղադրում եք այն մարդկանց, որոնք մի քանի օր առաջ են վերադարձել դիրքերից, մեղադրում եք այն մարդկանց, որոնք այս ընթացքում չեն քնել, իրենց ունեցածն ու չունեցածը տվել են, որպեսզի առաջնագծում մարդիկ ունենան անհրաժեշտ իրերը, մինչդեռ էդ հարեցրը դուք պիտի լուծեիք»,- դիմելով իշխանության ներկայացուցիչներին ասաց Քրիստինե Վարդանյանը։