Ինչ եմ արե՞լ, բանալին եմ խլե՞լ, ասեք իմանամ էլի. Պռոշյանի մանկապարտեզի տնօրենը՝ մանկապարտեզի միջադեպի մասին

Կոնկրետ կարող ե՞ք ասել` ո՞ւմ հետ, ինչպե՞ս, ես առաջին անգամ Ձեզնից եմ լսում այդ մասին: Ինձ կներեք, բայց դա անպատասխանատու արտահայտություն է: Այս մասին Operativ.am-ի թղթակցի հետ զրույցում ասաց Պռոշյանի մանկապարտեզի տնօրեն Սուսաննա Հովհաննիսյանն՝ արձագանքելով թերթերից մեկի գրած այն տեղեկությանը, որ երեկ քաշքշուկ է տեղի ունեցել իր և մանկապարտեզի տնտեսվարի ու հաշվապահի միջև:

Սուսաննա Հովհաննիսյանը նախ մեր թղթակցից փորձեց տեղեկանալ, թե ինչ է արել ինքը իրականում, որովհետև ինքն այդ ամենից տեղյակ չէր. «Ինչ եմ արե՞լ, բանալին եմ խլե՞լ, գրեմ էլի: Դա ինձ վերագրված պիտակ է: Մոլոդեց ինձ, որ էդքան բանի ունակ եմ: Նման բան այստեղ տեղի չի ունեցել, նման միջադեպ այստեղ տեղի չի ունեցել: Մենք շատ հաշտ, համերաշխ, գեղեցիկ ձևով հանդիպել ենք: Ես ընդամենը մեկ շաբաթ է, որ այստեղ նշանակված եմ և աշխատում եմ իմ պարտականությունների շրջանակներում: Ես առաջին անգամ չեմ կոլեկտիվ ղեկավարում, 32 տարի է ղեկավարում եմ կոլեկտիվ: Երեկ գրեթե ամբողջ օրն իրենց նախկին աշխատակիցներից մեկն ինձ հետ է եղել: Կուզե՞ք հեռախոսը փոխանցեմ իրեն, ինքը ասի»:

Մեզ հետ զրույցում նույն մանկապարտեզի լվացարար Ալվարդ Առուշանյանը, լսելով միջադեպի մասին, ասաց. «Ես ըտենց բան չեմ տեսել»:

Գայանե Մկրտչյանը՝ նույն մանկապարտեզի տնտեսվարը Operativ.am-ի թղթակցին փոխանցեց, որ իր բանալիները կորել են ու ոչ թե երեկ, այլ երկու օր առաջ, իսկ հարցին, թե ինքը տեղյալ է այն մասին, որ տնօրենը հաշվապահի ձեռքից խլել է երեխաների վճարման գրանցամատյանը, ասաց, որ ինքը նման բանի մասին տեղյակ չէ:

Մեր թղթակիցը զրուցեց նաև նույն մանկապարտեզի հաշվապահի՝ Արմինե Ավետիսյանի հետ, ով ասաց. «Սուտ ա, հոգնել ենք արդեն էդ տեղեկություններից, տենց բան չի եղել, տենց բան չկա»:

Մեր թղթակիցը զրուցեց նաև մանկապարտեզի նախկին տնօրեն Մաքրուհի Ազատյանի հետ, ով ասաց, որ ինքը նախորդ գյուղապետի օրոք էլ ինքն աշխատանքից ազատման դիմում է գրել, սակայն գյուղապետը պատռել է այն: Հիմա էլ իմ դիմումի համաձայն եմ ազատվել: Ես նույնիսկ ուրախ եմ, որ ազատվել եմ: Եթե ես դեմ լինեի, կդիմեի ձեզ ու մնացած լրատվամիջոցներին: