Քննիչներ կային ասում էին՝ կանչել ենք ՀՔԾ, 40 րոպե մնացեք, հետո ինչ ուզում եք արեք․ Գեղամ Մանուկյան
Նիկոլ Փաշինյանի հրաժարականը եւ նոր իշխանության ձեւավորումը հնարավորություն կտա ազգային արժանապատվությունը վերականգնելու եւ երկրում որեւէ բան փոխելու համար։ Այս մասին այսօր՝ դեկտեմբերի 23-ին, լրագրողների հետ զրույցում նշեց ՀՅԴ անդամ Գեղամ Մանուկյանը:
«Այս ամենը ընտրությունների, քվեների հետ կապված չէ։ Դա իրենց հարթ ուղեղներում է ամեն ինչը քվե, թիվ, գլխաքանակ։ Այնքան են գլխաքանակով դրանք մտածում, որ անգամ սգո երթը վարչական ռեսուրսներ օգտագործելով են կազմակերպել եւ հիմա ազատ ընտրություններ կազմակերպելու մասին են խոսում։ Խոսքը ազգային արժանապատվություն վերականգնելու եւ հայրենքի դավաճանության համար պատասխանատվության առաջին քայլը՝ հրաժարականն անելու համար է։ Հոգնեցրել են արդեն ժողովուրդ ասելով։ Իրենք մի պատգամավոր ունեն, որ Ազգային ժողովի ամբիոնից պողոսների մասին էր խոսում։ Իրենց ընտրած պողոսների մասին արհամարհական տոնով էր խոսում, իրենք էլ մեծ ջերմությամբ պաշտպանում էին։ Նիկոլ Փաշինյանն էլ հեռանա, ձեւավորվի նոր իշխանություն, ես չեմ օգտագործի հաջողություն բառը, որովհետեւ հաջողությունն ուրիշ է։ Հայրենիք կորցրած մարդը չի կարող այդ ամենով ուրախանալ, առնվազն հույս կլինի երկրում որեւէ հնարավոր է ինչ-որ բան փոխելու։ Նաեւ վերականգման հնարավորություն կտրվի ժողովրդին»,- ասաց Գեղամ Մանուկյանը։
Գեղամ Մանուկյանի կարծիքով՝ Իշխան Սաղաթելյանի՝ ՀՔԾ հրավիրելը ապացուցում է, որ իշխանությունը փորձում է ճնշումներ գործադրել ընդդիմադիրների նկատմամբ։
«Որեւէ տեղեկություն չունենք, սպասում ենք Իշխան Սաղաթելյանի եւ իր փաստաբանների հայտարարությունը, որովհետեւ անհստակ էր, թե ինչ կարող էր լինել։ Կար հայտարարություն ուղղակի աբսուրդային դեպք է։ Բայց ժամանակ անց կարծում եմ՝ հստակություն կմտնի եւ հանրահավաքին կհայտարարենք։ Իշխանությունը փորձում է ճնշումներ գործադրել։ Նույնիսկ ազնիվ քննիչներ կային ասում էին՝ կանչել ենք ՀՔԾ հանրահավաքի ժամին, 40 րոպե մնացեք, հետո ինչ ուզում եք արեք»,- պատմեց Գեղամ Մանուկյանը։
Ըստ Գեղամ Մանուկյանի՝ «Իմ քայլը» դաշինքից շատ պատգամավոր կարծում են, որ Նիկոլ Փաշինյանը պետք է հեռանա, սակայն այդ մասին չեն բարձրաձայնում, քանի որ կյանքում որեւէ բան չարած մարդիկ են։
«Ոչ հրապարակային շատերը մեղքի զգացումով խոսում են։ Հրապարակային որեւէ մեկը չի համարձակվում Նիկոլ Փաշինյանի դեմ մի բառ ասել։ Շատերն արձագանքում են, որ րոպե առաջ Նիկոլ Փաշինյանը պետք է հեռանա։ Այդ մասին չեն բարձրաձայնում, որովհետեւ, որովհետեւ կյանքում որեւէ բան չունեցած, որեւէ քայլ չարած, կենսագրություն չունեցած մարդիկ են, որոնք, երկնքից իջնելով հայտնվեցին Ազգային ժողովում, կարծելով, որ պատգամավոր են, եւ որ դա էլ մեծ բան է։ Երազանք ունեն մեկ-երկու ամիս էլ ձգեն, որ իրենց բակի երեխաներին ասեն՝ պատգամավոր են»,- ավելացրեց Գեղամ Մանուկյանը։